მონტე კარლოს "მასტერსზე" სენსაციები გრძელდება. ამჯერად, ტურნირს მსოფლიო რეიტინგის მეშვიდე ჩოგანი, არგენტინელი ხუან მარტინ დელ პოტრო გამოეთიშა, რომელმაც მესამე რაუნდის მატჩში, მოულოდნელად წააგო ვეტერან ფინელ იარკო ნიემინენთან - 4:6, 6:4, 7:6 (4).

შეხვედრა იარკომ ბრწინვალედ დაიწყო და მალევე ბრეიკით დაწინაურდა - 2:0, თუმცა სეტის მიწურულს, მეცხრე გეიმში დელ პოტრომ უკუბრეიკი შეასრულა და სხვაობა გეიმებს შორის მინიმუმამდე დაიყვანა - 4:5. არგენტინელმა მოულოდნელად მომდევნო გეიმი საკუთარ ჩაწოდებაზე ძალზე სუსტად ჩაატარა, რამაც საშუალება მისცა ფინელს, პარტია სათავისოდ დაეტოვებინა - 6:4.

მეორე სეტში არგენტინელი დროულად "გამოცოცხლდა", მესამე გეიმში შესრულებული ერთადერთი ბრეიკით, პარტიებს შორის ანგარიში იოლად გაათანაბრა - 1:1 (4:6, 6:4).

გადამწყვეტ, მესამე სეტში მოვლენები ძალზე დრამატულად განვითარდა. ორივე ჩოგბურთელმა 3-3 ჯერ შეძლო ერთმანეთის ჩაწოდების აღება, რის შემდეგაც დაინიშნა "საჩემპიონო" ტაიბრეიკი, რომელზეც ფინელმა გაცილებით უკეთ იასპარეზა და მეოთხედფინალის საგზურიც მოიპოვა.

მატჩი 2 საათსა და 40 წუთს გაგრძელდა და ამ დროის განმავლობაში, ხუან მარტინმა 7 ეისი ჩააწოდა და 2 ორმაგი შეცდომა დაუშვა, ნიემინენმა 4 ეისით გამოიჩინა თავი და არცერთი ორმაგი არ დაუშვია.

დღევანდელი მატჩი, ამ ჩოგბურთელთა ურთიერთდაპირისპირებათა ისტორიაში რიგით მეხუთე გამოდგა და დელ პოტრო, ჯერჯერობით, დამაჯერებლად ლიდერობს - 4:1.

ტურნირის მეოთხედფინალურ ეტაპზე, ფინელი სპორტსმენი მსოფლიო რეიტინგის ლიდერს, სერბ ნოვაკ ჯოკოვიჩს შეხვდება, რომელმაც რამდენიმე საათით ადრე, ასპარეზობას კიდევ ერთი არგენტინელი, ხუან მონაკო გამოთიშა - 4:6, 6:2, 6:2.