იტალიური “ნაპოლის” პრეზიდენტმა აურელიო დე ლაურენტისმა განაცხადა, რომ უახლოეს პერიოდში კლუბი თავდამსხმელ გონსალო იგუაინსა და მეკარე ხოსე რეინას ოფიციალურად წარადგენს.

ცნობილია, რომ ნეაპოლელებმა 25 წლის არგენტინელი ფორვარდის სანაცვლოდ 35 მილიონი ევრო გადაიხადეს, ხოლო ესპანელი კარის დარაჯი მათ ერთწლიანი იჯარით შეუერთდა.

“იგუაინმა და რეინამ სამედიცინო შემოწმება გაიარეს და ჩვენს კლუბს უახლოეს დღეებში შეუერთდებიან. ორშაბათს საღამოს დიდი ზეიმის მოწყობას ვგეგმავთ და სწორედ იქ წარვადგენთ გუნდის ახალწვეულებს. ასევე, მოვახდენთ ახალი ფორმის და ჰიმნის დემონსტრირებას. ზაფხულის პერიოდში კარგად ვიმუშავეთ, თუმცა, მიღწეულზე შეჩერებას სულაც არ ვაპირებთ”, - დაწერა საკუთარ თვითერზე დე ლაურენტისმა.

გარდა ზემოთ ნახსენები ფეხბურთელებისა, ზაფხულის სატრანსფერო პერიოდში “ნაპოლიმ” დრის მერტენსი, რაულ ალბიოლი, ხოსე კალიეხონი და მეკარე რაფაელი შეიძინა.