იტალიური “ნაპოლის” პრეზიდენტმა აურელიო დე ლაურენტისმა ნეაპოლელთა მიერ განხორციელებულ ბოლოდროინდელ ტრანსფერებზე ისაუბრა. მან საკუთარ “თვითერზე” ყველა მსურველის კითხვებს უპასუხა.
“ჩვენ დავამთავრეთ მოლაპარაკება “ესტუდიანტესთან” და დიუვან საპატესთან კონტრაქტი გავაფორმეთ. ის უახლოეს დღეებში შემოგვიერთდება. მატრისთან დაკავშირებით კონკრეტული არაფერი ყოფილა. უბრალოდ, ბეპე მაროტას სამი კვირის წინ ტრანსფერის შესაძლებლობაზე ვესაუბრეთ, მაგრამ გადავწყვიტეთ, რომ უფრო შორს არ წავსულიყავით. ჩვენ არა მისი შესაძლებლობები, არამედ ასაკი გვაფიქრებდა და ამიტომ, არჩევანი საპატეზე შევაჩერეთ.
ყველას აინტერესებს, შევიძენთ თუ არა კიდევ ვინმეს სატრანსფერო ფანჯრის დახურვამდე. ვფიქრობ, ამაზე საუბარი ნაადრევია. ვნახოთ, შესაძლოა რაღაც გამოგვრჩა და გაძლიერება კიდევ დაგვჭირდება. სუნიაგი ჩვენთან რჩება და “ნაპოლის” მაისურით აუცილებლად ითამაშებს. რაც შეეხება ჩვენს საუკეთესო შენაძენს, ეს უდავოდ რაფაელ ბენიტესია”, - დაწერა დე ლაურენტისმა და ისიც განაცხადა, რომ უახლოეს პერიოდში “ნაპოლის” სტადიონ “სან პაოლოს” რეკონსტრუქცია ჩაუტარდება.
