თორნიკე შენგელიას “ჩიკაგო ბულსმა” ნიუ იორკში “ნიქსთან” 89:100 წააგო და აღმოსავლეთ კონფერენციის მე-3 ადგილი, რომლისთვისაც “ტორონტო რეპტორზთან” დიდი ბრძოლა აქვს გაჩაღებული, ისევ კანადურ კლუბს გადაულოცა.

გასულ შეხვედრაში ქართველი ფორვარდი ისევ თადარიგში დარჩა, “ხარებს” კი ტრადიციულად ჟოაკიმ ნოამ ულიდერა, რომელიც ჩინებულ სეზონს ატარებს. ამჯერად, ფრანგი კალათბურთელის მონაგარი 13 ქულა, 17 მოხსნა და 9 პასი იყო.

“ჩიკაგოს” და “ტორონტოს” 47 მოგება და 33 მარცხი აქვთ, დამატებითი მაჩვენებლებით კი მე-3 პოზიციაზე “რეპტორზი” იმყოფება. 15 აპრილის დილას კანადელები ზაზა ფაჩულიას “მილუოკი ბაქსს” უმასპინძლებენ, “ბულსი” კი ქართველი ცენტრის ერთ-ერთ ყოფილ კლუბ “ორლანდო მეჯიქს” დაუხვდება.

ეროვნული საკალათბურთო ასოციაციის (NBA) რეგულარული სეზონის დასრულებამდე 3 სათამაშო დღე რჩება, რის შემდეგაც პლეი ოფის წყვილებიც დაკომპლექტდება. ამჟამად, ბრძოლა დასავლეთ კონფერენციაში ერთადერთი საგზურისთვისღა მიდის და გასარკვევი ისაა, მე-8 ადგილს “მემფისი” დაიკავებს თუ “ფინიქსი”.