იაროსლავ ნავრატილმა ჩეხეთის საჩოგბურთო ფედერაციასთან კონტრაქტი გააგრძელა და დასავლეთსლავ მამაკაცთა ნაკრებს 2015 წლამდე უკაპიტნებს. 56 წლის სპეციალისტი ჩეხთა ეროვნულ გუნდს 2006 წლიდან ხელმძღვანელობდა, 2012-ში დევისის თასი მოაგებინა, წლეულს კი ავადმყოფობის გამო პოსტი დროებით ვლადიმირ შაფარჟიკს დაუთმო. ამ უკანასკნელის მეთაურობით ჩეხებმა საჩემპიონო ტიტული (ფინალში სერბებს 3:2 სძლიეს) შეინარჩუნეს.

“კონტრაქტზე ხელმოწერამდე ტომაშ ბერდიხსა და რადეკ შტეპანეკს მოვეთათბირე და გადაწყვეტილება მხოლოდ ამის შემდეგ მივიღე”, - განუცხადა ჟურნალისტებს ნავრატილმა. ისიც გაცხადდა, რომ ბერდიხი და შტეპანეკი დევისის თასის მორიგ გათამაშებაშიც დაიცავენ ჩეხეთის საჩოგბურთო ღირსებას. ბოლო 2 წლის განმავლობაში სწორედ ამ მოთამაშეებმა შეიტანეს ძირითადი წვლილი ჩეხთა ტრიუმფში, ორივეჯერ კი გადამწყვეტი ქულა თავის გუნდს შტეპანეკმა მოუპოვა.

დევისის თასის 2014 წლის გათამაშების პირველ ეტაპზე ჩეხები ჰოლანდიელებს შეხვდებიან.