შესაძლოა, ჟოზე მოურინიოსა და გონსალო იგუაინის გზები კიდევ ერთხელ გადაიკვეთოს. The Sun-ის ცნობით, “არისტოკრატთა” პორტუგალიელ თავკაცს ყოფილი შეგირდის ხილვა “სტემფორდ ბრიჯზე” სურს.

“ჩელსის” სამწვრთნელო შტაბი ფერნანდო ტორესის, სამუელ ეტო’ოსა და დემბა ბას დაბალი შედეგიანობით უკმაყოფილოა და შეტევის ხაზის გაძლიერება სურს. მიმდინარე სეზონში, “ნაპოლის” არგენტინელი ლეგიონერი კარგად ირჯება და უკვე 13 გოლს მოუყარა თავი.

მოგეხსენებათ, იგუაინი “ნაპოლიმ” “რეალისგან”, 32 მილიონი გირვანქა სტერლინგის სანაცვლოდ შეიძინა. “ჩელსი” “ალბისელესტეს” ფორვარდში 48 მილიონ გირვანქა სტერლინგს იხდის და არაა გამორიცხული, იტალიელთაგან თანხმობა მიიღოს.