ჩემპიონთა ლიგაზე, გერმანული გუნდების მიერ ესპანური გრანდებისთვის შეურაცხყოფის მიყენების შემდეგ, ევროპის ლიგის ჯერი დგება. კონტინენტის პრესტიჟით მე-2 საკლუბო ტურნირზე ჩემპიონთა ლიგის მსგავს სცენარს ვერ ვიხილავთ, რადგან აქ გერმანული და ესპანური გუნდები არ თამაშობენ და გარდა ამისა, 4 გუნდი ოთხ სხვადასხვა ქვეყანას წარმოადგენს.

გათამაშების უმთავრესი ფავორიტი ჩემპიონთა ლიგის ჯერ კიდევ მოქმედი გამარჯვებული ლონდონის “ჩელსია”. “არისტოკრატებს” წილისყრამ “ბაზელი” არგუნა. პირველი თამაში შვეიცარიაში გაიმართება. მასპინძლები, დიდი ალბათობით, სრული შემადგენლობით ითამაშებენ. მცირე ტრავმა აქვს ფილიპ დეგენს, მაგრამ მას მაინც ძირითად შემადგენლობაში უნდა ველოდეთ. “ჩელსის” პრობლემები კვლავ დაცვის მარცხენა ფლანგზე აქვს. ტრავმირებული ეშლი კოული გუნდს შვეიცარიაში კი გაჰყვა, მაგრამ ძირითად შემადგენლობაში თამაშის მეტი შანსი მაინც რაიან ბერტრანდს აქვს. მცირე ტრავმა აწუხებს გარი კეჰილსაც, მაგრამ სავარაუედოდ, ის თამაშამდე სრულად გამოჯანმრთელებას მოასწრებს. გადაჭრით იმის თქმა შეიძლება, რომ “ჩელსის” ორიოლ რომეუ და დემბა ბა ვერ დაეხმარებიან. პირველი მათგანი ტრავმრებულია, ხოლო მეორეს ევროპის ლიგაზე თამაშის უფლება არ აქვს.

დღეს სტუმრად მოთამაშე გუნდი უნდა მივიჩნიოთ ფავორიტად მე-2 წყვილშიც. ევროპის ლიგის მიმდინარე გათამაშებაში, “ბენფიკა” ძალზე კარგად თამაშობს და პორტუაგლიელებს ფინალში გასვლის მეტოქეზე მეტი შანსიც აქვთ, მაგრამ იმის გათვალისწინებით, რომ დღევანდელი თამაში თურქეთში გაიმართება, კონკრეტულად ამ თამაშში, “ფენერბაჰჩე” უშანსოდ ნამდვილად არაა.

დანაკლისი ორივე გუნდს აქვს. დისკვალიფიკაციის გამო, მასპინძლებს ჯანერ ერქინი, ხოლო სტუმრებს ენცო პერესი და ალმეიდა ვერ დაეხმარებიანნ “ფენერბაჰჩეს” რიგებში, ევროპის ლიგაზე თამაშის უფლება არ აქვს ემრე ბელუზოღლუს.

“ფენერბაჰჩე” და “ბენფიკა” ერთმანეთს აქამდეც შეხვედრიან. 1975 წელს, ჩემპიონთა თასის პირველ ეტაპზე, პორტუგალიელებმა თურქეთში 0:1 კი წააგეს, მაგრამ პირველი თამაში მათ 7:0 ჰქონდათ მოგებული.

ბაზელი-ჩელსი

• ევროპის ლიგაზე, სტანდარტული მდგომარეობის შემდეგ, ყველაზე მეტი, 7 გოლი “ბაზელს” აქვს გატანილი;
• ევროპის ლიგაზე ჩატარებულ ბოლო 3 თამაშში ფერნანდო ტორესმა 4 გოლი გაიტანა;
• ევროტურნირებზე ჩატარებული ბოლო 5 გასვლითი თამაშიდან “ჩელსიმ” 4 წააგო;
• “ჩელსის” შანსი აქვს გახდეს პირველი გუნდი, რომელიც ჩემპიონთა თასის მოგების შემდეგ, მომდევნო სეზონში, უეფას თასს მოიგებს.

სავარაუდო შემადგენლობები

ბაზელი (4-4-2): სომერი, შტაინჰიოფერი, დეგანი, დრაგოვიჩი, შარი, სალაჰი, კაბრალი, ფ. ფრაი, შტოკერი, შტრელერი, ბობადილა.

ჩელსი (4-5-1): ჩეხი, ასპილიკუეტა, ტერი, კეჰილი, ბერტრანდი, მოზესი, ლემპარდი, რამირესი, ოსკარი, მატა, ტორესი.

მსაჯი: პაველ კრალოვეცი (ჩეხეთი).

ფენერბაჰჩე-ბენფიკა

• “ფენერბაჰჩე” ევროტურნირის ნახევარფინალში პირველად ითამაშებს;
• “ბენფიკა” ერთადერთი გუნდია, რომელსაც ევროპის ლიგის მიმდინარე გათამაშებაში წაგება არ აქვს. ჩემპიონთა ლიგიდიან ამ ტურნირზე გადმოსვლის შემდეგ, პორტუგალიელებმა 5 თამაში მოიგეს და 1 ფრედ დაასრულეს;

სავარაუდო შემადგენლობები

ფერნებაჰჩე (4-3-2-1): ვოლკანი, გონული, იობო, კორკმაზი, ციგლერი, მეირელეში, შაჰინი, ბარონი, კუიტი, ერკინი, ვებო.

ბენფიკა (4-2-3-1): არტური, პერეირა, ლუიზაო, გარაი, მელგარეხო, მატიჩი, პერესი, სალვიო, ლიმა, გაიტანი, კარდოსო.

მსაჯი: მილორად მაზიჩი (სერბეთი).