კოტდივუარელი თავდამსხმელი დიდიე დროგბა შეიძლება ლონდონის “ჩელსიში” დაბრუნდეს. 36 წლის ფეხბურთელს სტამბოლის “გალათასარაისთან” კონტრაქტი დაუმთავრდა და ახლახან ოფიციალური წერილიც გავრცელდა, რომლითაც დროგბა გულშემატკივრებს დაემშვიდობა.

Daily Mail-ის ცნობით, “ჩელსის” ხელმძღვანელობა და სამწვრთნელო შტაბი ამ ტრანსფერის განხორციელებით დაინტერესებულნი არიან და სავარაუდოდ საწადელსაც მიაღწევენ, თუმცა “ლივერპულისა” და “იუვენტუსის” სახით სერიოზული კონკურენტები ჰყავთ.

დიდიე დროგბა “ჩელსიში” 2004-2012 წლებში თამაშობდა. “გალათასარაის” მაისურა კი 2013 წლის იანვრიდან მოირგო და მას შემდეგ, თურქეთის ჩემპიონატსა და ჩემპიონთა ლიგაში ჩატარებულ 49 შეხვედრაში თავი 18 გოლით და 9 საგოლე პასით გამოიჩინა.