"მედისონ სქვერ გარდენმა" დღეს გამთენიისას ბრწყინვალე მატჩს უმასპინძლა. "ნიუ იორკს" ბოლო 5 ღამის განმავლობაში მეოთხე მატჩის გამართვა უწევდა, თან ტრავმირებული გახლდათ მისი უდავო ლიდერი კარმელო ენტონი (ფეხის მცირე ტრავმა), მაგრამ მიუხედავად ამ ფაქტორებისა, მაიკ ვუდსონის დამოძღვრილი გუნდი საკუთარ ტერიტორიაზე ბოლომდე გმირულად ებრძოლა ჩემპიონობის ერთ ერთ მთავარ მაძიებელ "ოკლაჰომას" და მხოლოდ უკანასკნელ წამებზე იწვნია დასანანი მარცხი 94:95.
"ნიქსის" სასტარტო ხუთეულში 2 გადანაცვლება მოხდა, ჯეისონ კიდის და "მელოს" ადგილი 40 წლის კურტ ტომასმა და ჯეიმს ვაითმა დაიკავეს. სწორედ ამ უკანასკნელთა ზუსტი სროლების შემდეგ მატჩის სტარტზე დაწინაურდნენ მასპინძლები 5:0. რამდენიმე წუთში რაიმონდ ფელტონმაც ჩააგდო საშუალო დისტანციიდან და "ნიუ იორკი" 13:7 გავიდა წინ. სკოტ ბრუქსმა წუთშესვენება აიღო, რამაც შედეგი მყისიერად მოიტანა, "თანდერი" გამოფხიზლდა, რას ვესტბრუკმა, კევინ დურანტმა და ტაბო სეფალოშამ 13:0 გაქცევა მოუწყვეს მეტოქეს და 7 ქულიანი ჰანდიკაპით დაწინაურდნენ. "ოკლაჰომას" ძირითადმა გამთამაშებელმა პირველი მეოთხედი 15 ქულით დაასრულა და პირადად მოაგებინა საკუთარ გუნდს 35:26.
მეორე პერიოდის საწყისი წუთებიდანვე პარკეტზე "ნიუ იორკის" მეორე ხუთეულის წევრები გამოჩნდნენ ჯეი არ სმიტის, ამარე სტადემაირის და კენიონ მარტინის შემადგენლობით. სამივე მათგანი უაღესად სასარგებლონი გახდნენ. სმიტი ნებისმიერი დისტანციიდან ბომბავდა მეტოქის კალათს, ამარემ 3 წამიანი ზონა დაიპყრო და რამდენიმეჯერ ისეთი “სლემ დანქი” შემოგვთავაზა, დარბაზი კინაღამ დაინგრა ოვაციებისაგან. მარტინმა კი, რომელმაც მეორედ გააფორმა "ნიუ იორკთან" 10 დღიანი კონტრაქტი, პირველად მიიღო დიდი სათამაშო დრო და მანაც ეს შანსი შესანიშნავად გამოიყენა, იგი პერიოდულად ძალიან კარგად ართმევდა თავს კევინ დურანტის მეურვეობას, თუმცა საბოლოოდ 6 პერსონალურით მაინც ნაადრევად მოუწია შეხვედრის დასრულება. ჯეი არმა დიდ შევენებამდე 18 წამით ადრე მორიგი სამქულიანი "მიართვა" მეტოქეს და პირველი ტაიმი მასპინძლებმა მოიგეს 59:56.
მესამე მეოთხედში ორივე გუნდმა დაცვაში თამაშს უმატა, რის გამოც შედეგიანობამ იკლო. ვერცერთი მათგანი ვერ ახერხებდა დიდი სხვაობით წინ გასულიყო და ანგარიშში გაქცეოდა მეტოქეს, ვესტბრუკი ინერტული გახლდათ, სამაგიეროდ ამუშავდა მეორე "ქულების მანქანა" "ოკლაჰომას" რიგებში - კევინ დურანტი, რომელიც ხშირად აწიოკებდა მეტოქის დაცვას და არც ტაისონ ჩენდლერს უშინდებოდა, რომელიც გამალებით დარაჯობდა საკუთარ სამწამიან ზონას. "დურანტულას" ერთ ერთი ასეთი "ლაშქრობისას" კენიონ მარტინმა ისე “მიაბლოკშოტა” დურანტი, რომ "თანდერის" ლიდერი მოწყვეტით დაენარცხა პარკეტზე, მაგრამ ამ ფაქტმა სტუმრები უფრო გააშმაგა, რომელთაც ახალი იერიშები წამოიწყეს, ამჯერად უკვე პერიმეტრიდან. მაგრამ ოკლაჰომელთა საპასუხოდ "ნიუ იორკის" რიგებში ბრწყინავდა ჯეი არ სმიტი, რომელიც ინდივიდუალური ქმედებების ხარჯზე რიგ ეპიზოდებში მარტო ებრძოდა სტუმრებს და წარმატებითაც.
მეოთხე მეოთხედის დასრულებამდე 1:38 წუთით ადრე დურანტმა საშუალო დისტანციიდან ზუსტად ისროლა და საკუთარი გუნდი კვლავ გაალიდერა 95:94. საპასუხო შეტევაში სმიტმა სამიანი გაუშვა, მაგრამ არაზუსტად, სტუმრებმა დიდი შანსი მიიღეს შეხვედრის მოგების, მაგრამ ვერც მათ დაასრულეს წარმატებით კომბინაცია, რის შედეგადაც მასპინძლებს მატჩის მოსაგებად 7 წამი დარჩათ, ჯეი არმა ისევ საკუთარ თავზე აიღო თამაში და სცადა მატჩის გმირი გამხდარიყო, მისმა ნატყორცნმა ბურთმა ამჯერადაც ვერ ჩაეშვა ზუსტად კალათში და "ოკლაჰომამ" უმძიმესი გამარჯვება მოიპოვა 95:94.
შეხვედრის გმირი კევინ დურანტი გახდა, რომლის მონაგარი 34 ქულა, 8 მოხსნა და 6 შედეგიანი პასი იყო, "ნიუ იორკის" შემადგენლობაში კი ერთპიროვნულად გამოირჩა სმიტი, რომელმაც 36 წუთში 36 ქულა უთავაზა მეტოქეს.

ნიუ იორკი - ოკლაჰომა 94:95 (26:35, 30:24, 25:16, 13:20)
ნიუ იორკი: ვაითი (6), შამპერტი (2), ჩენდლერი (9), ტომასი (2), ფელტონი (16); მარტინი (4), კიდი, სტადემაირი (16), სმიტი (36), ნოვაკი (3)
ოკლაჰომა: ვესტბრუკი (21), სეფალოშა (2), პერკინსი (2), იბაკა (12+5დ), დურანტი (34+8მ+6პ); მარტინი (16), კოლისონი, ფიშერი, ჯექსონი (8)

დენვერი - კლიპერსი 107:92 (27:25, 22:24, 36:26, 22:17)
დენვერი: ლოუსონი (21+11პ), იგუადალა (14), კუფოსი (6), ფარიდი (11+10მ), გალინარი (20); მილერი (12), ბრიუერი (11), მაკგი, ჩენდლერი (12)
კლიპერსი: პოლი (16+10პ), ბილაფსი (8), ჯორდანი (7), გრიფინი (17), ბატლერი (8);, ოდომი (8), ჰილი (2), ბლედსოუ (5), ბარნსი (19), გრინი (2)

დასავლეთ კონფერენცია

აღმოსავლეთ კონფერენცია