ქართველი ჩოგბურთელი მარიამ ბოლქვაძე ჩინებულად ასპარეზობს ყაზახეთის დედაქალაქ ასტანაში მიმდინარე საერთაშორისო ტურნირზე, რომლის საპრიზო ფონდიც 10 ათასი დოლარია. მარიამმა მე-4 გამარჯვება იზეიმა და ფინალის საგზური მოიპოვა.

აღსანიშნავია, რომ 16 წლის ქართველმა ჩოგბურთელმა ყველა შეხვედრა დამაჯერებლად მოიგო, რაზეც ისიც მოწმობს, რომ არცერთ სეტში სამ გეიმზე მეტი არ დაუთმია.

ნახევარფინალში ბოლქვაძე მე-5 ნომრად განთესილ ყაზახ ეკატერინა კლიუევას გაეჯიბრა და 6:2, 6:1 მოიგო.

ფინალში მარიამის მეტოქე მე-6 რეიტინგის მქონე უზბეკი ვლადა ეკშიბაროვა იქნება, რომელმაც ნახევარფინალში რუს მარია ცაკანიანს 6:2, 7:5 სძლია.

ცნობისთვის, ქალთა საჩოგბურთო ასოციაციის (WTA) რეიტინგში ბოლქვაძეს 9 ქულით 1067-ე ადგილი უკავია, ხოლო ეკშიბაროვა 23 ქულით 793-ე გახლავთ.

ასტანაშივე ვაჟთა 10-ათასიანი ტურნირის ფინალში გასვლის შანსი ჰქონდა ალექსანდრე მეტრეველსაც, თუმცა მიზანს ვერ უწია. მე-3 ნომრად განთესილმა ქართველმა ჩოგბურთელმა ნახევარფინალში პირველი რეიტინგის მქონე ყაზახ დენის იევსეეთან 5:7, 6:7 (3:7) წააგო.