მატჩის დასაწყისი ბოლნისელებს კარგს არაფერს უქადდა, რადგან “გურია” უპირატესობას დაეუფლა და ანგარიშის გახსნის რეალური შანსიც ჰქონდა. უკვე, მე-6 წუთზე, მეტოქის საჯარიმოში ეულად მყოფმა ტარიელ კუკულაძემ ბურთი დაამუშავა და მარჯვენა, არცთუ მახვილი კუთხიდან მიზანს ააცილა.
მე-9 წუთზე, ერეკლე კილაძემ კარგი პასით ფარერების ჩემპიონატში ნათამაშები მამუკა ტორონჯაძე მასპინძელთა მეკარესთან პირისპირ გაიყვანა, მაგრამ ლანჩხუთელმა მირზა მერლანს ვერ აჯობა.
მე-16 წუთზე, თეიმურაზ შარაშენიძემ მარცხენა ფლანგიდან საჯარიმო შეასრულა და პირდაპირ კარისკენ გაგზავნა ბურთი, რომელიც მერლანმა მუშტებით მოიგერია.
მე-20 წუთზე, ლაშა პარუნაშვილი დაცვიდან ბურთის “ამოტანისას” უხეშად შეცდა, მაგრამ “სიონის” საჯარიმოში მყოფმა ტორონჯაძემ კარში დარტყმა დაახანა და ბურთი დაკარგა. ამ ეპიზოდიდან დიდი ხანი არ იყო გასული, რომ მარცხენა ფლანგიდან ალექსანდრე კოშკაძის პასის მერე, მეტოქის კარის წინ მყოფმა ტორონჯაძემ ახლო მანძილიდან ხეირიანად ვერ დაარტყა და ლაშა თოთაძის მიერ მოგერიებული ბურთი ხარიხას ზემოდან დაეცა.
43-ე წუთზე, საჰაერო ორთაბრძოლისას, ჩუენსუმ გიორგი კახელიშვილის წინააღმდეგ იუხეშა. მსაჯის სასტვენის შემდეგ, კახელიშვილმა კამერუნელ ლეგიონერთან ურთიერთობის გარკვევა გააგრძელა და ჯერ თავზე ხელით შეეხო, შემდეგ კი, ფეხი ფეხში მიარტყა, რასაც აფრიკელის დაცემა მოჰყვა. ლანჩხუთელები კახელიშვილისთვის ყვითელ ბარათს ითხოვდნენ, მაგრამ საბოლოოდ მსაჯმა ისინი დასაჯა და ყველაზე აქტიური მინდია ბობღიაშვილი გააფრთხილა.
ტაიმის ბოლო წუთზე “სიონმა” მარცხნიდან შეუტია და მეტოქის საჯარიმოში ბურთიანად შესულმა პარუნაშვილმა გამოზომილი პასი ჯაბა უგულავას გაუკეთა, რომელმაც თავური დარტყმით მასპინძლები დააწინაურა – 1:0.
54-ე წუთზე, კობა შალამბერიძემ “სიონის” ნახევარზე ბურთი ზვიად ლობჟანიძეს აართვა და საჯარიმოს მისადგომებიდან სახიფათო დარტყმით მიზანს მცირე მანძილით ააცილა. ორი წუთის შემდეგ, კახელიშვილმა ინდივიდუალური გარღვევა დარტყმით დაასრულა და ბურთმა ლანჩხუთელთა კარის ძელს სანტიმეტრებში ჩაუარა.
58-ე წუთზე, მარცხენა ფლანგიდან თოთაძემ “გურიას” საჯარიმოში ჩაჰკიდა ბურთი, რომელიც ბობღიაშვილმა ვერ შეიმაგრა და კახელიშვილმა ხელსაყრელი პოზიციიდან ვერ გაიტანა.
64-ე წუთზე, მარცხნიდან გიორგი ბიბილეიშვილის ჩამოწოდების შემდეგ, ბობღიაშვილი გამოსვლაზე შეცდა და კახელიშვილმა თავურით ანგარიშში სხვაობა ორამდე გაზარდა.
ამის შემდეგ, მოედანზე საინტერესო არაფერი მომხდარა და “სიონმა” ზედიზედ მეორე გამარჯვება მოიპოვა.
სიონი (ბოლნისი) – გურია (ლანჩხუთი) 2:0 (1:0)
25 აგვისტო. თბილისი. მიხელ მესხის სახელობის სტადიონი.
სიონი: მერლანი, ტვილდიანი, თოთაძე, განუგრავა, სვანიძე (კ), ქემოკლიძე, პარუნაშვილი, კახელიშვილი, ლობჟანიძე (ბიბილეიშვილი, 58), მიკუჩაძე (აფციაური, 71), უგულავა (გოგობერიშვილი, 90).
მთავარი მწვრთნელი: გიორგი კიკნაძე.
გურია: ბობღიაშვილი, ჩუენსუ, იობაშვილი, ჩიკვილაძე, ჯიშკარიანი, კილაძე, დარჩიძე (გაჩეჩილაძე, 63), კუკულაძე (კ) (შალამბერიძე, 46), კოშკაძე, შარაშენიძე, ტორონჯაძე (შენგელია, 68).
მთავარი მწვრთნელი: დავით მახარაძე.
გოლები: 1:0 უგულავა (45), 2:0 კახელიშვილი (64).
გაფრთხილება: განუგრავა (15), კუკულაძე (34), ბობღიაშვილი (44), პარუნაშვილი (56), შარაშენიძე (68), ჩუენსუ (73), ბიბილეიშვილი (74).
მთავარი მსაჯი: დავით სანოძე.
25-ე ეროვნული საფეხბურთო ჩემპიონატი
III ტური. 25 აგვისტო
ვიტ ჯორჯია (თბილისი) – ჩიხურა (საჩხერე) 0:2 (0:1)
გოლი: 0:1 გიორგი დათუნაიშვილი (43), 0:2 დიმიტრი ტატანაშვილი (69)
მერანი (მარტვილი) – ზუგდიდი 2:0 (1:0)
გოლი: 1:0 შოთა ბაბუნაშვილი (42), 2:0 ლაშა კუჭუხიძე (93)
26 აგვისტო
მეტალურგი (რუსთავი) – ზესტაფონი
გადაიდო
დინამო (თბილისი) – სპარტაკი (ცხინვალი)
ტორპედო (ქუთაისი) – დილა (გორი)
მეგოლეები:
3 – გრიგოლ დოლიძე (“დილა”), დიმიტრი ტატანაშვილი (“ჩიხურა”)
| 1 | ჩიხურა | 3 | 2 | 0 | 1 | 7:4 | 6 |
| 2 | სიონი | 3 | 2 | 0 | 1 | 5:2 | 6 |
| 3 | მერანი | 3 | 2 | 0 | 1 | 4:2 | 6 |
| 4 | მეტალურგი |
2 | 1 | 1 | 0 | 4:3 | 4 |
| 5 | ტორპედო | 2 | 1 | 1 | 0 | 4:3 | 4 |
| 6 | ვიტ ჯორჯია | 3 | 1 | 1 | 1 | 3:2 | 4 |
| 7 | დინამო თბილისი | 2 | 1 | 1 | 0 | 3:2 | 4 |
| 8 | დილა | 2 | 1 | 1 | 0 | 3:2 | 4 |
| 9 | გურია |
3 | 1 | 0 | 2 | 1:5 | 3 |
| 10 | ზუგდიდი |
3 | 0 | 1 | 2 | 1:5 | 1 |
| 11 | ზესტაფონი | 2 | 0 | 0 | 2 | 3:5 | 0 |
| 12 | სპარტაკი |
2 | 0 | 0 | 2 | 1:4 |
0 |
შენიშვნა: საქართველოს ფეხბურთის ფედერაციის დებულების თანახმად, უმაღლეს, პირველ და დუბლების ჩემპიონატებში თანაბარი ქულების დაგროვების შემთხვევაში, ადგილები შემდეგი პრიორიტეტული პრინციპით გაირკვევა:
- ჩემპიონატში უშუალოდ ურთიერთშეხვედრების შედეგები (ქულათა რაოდენობა და შემდეგ ბურთების უკეთესი სხვაობა. ბურთების ერთნაირი სხვაობის შემთხვევაში, უპირატესობა მიენიჭება გუნდს, რომელსაც ერთმანეთთან შეხვედრებში სტუმრად მეტი გოლი აქვს გატანილი);
-ჩემპიონატში მოგებათა მეტი რაოდენობა;
-ჩემპიონატში გატანილი და მიღებული ბურთების უკეთესი სხვაობა;
-ჩემპიონატში გატანილი გოლების მეტი რაოდენობა;
-ჩემპიონატის განმავლობაში, გუნდის მიერ მიღებული წითელ-ყვითელი ბარათების რაოდენობა (წითელი 3 ქულა, ყვითელი – 1 ქულა. თანაბარი ქულების დაგროვების შემთხვევაში, უპირატესობა მიენიჭება ნაკლებ წითელ ბარათს);
-თუ გუნდებს ეს მაჩვენებელიც თანაბარი აღმოაჩნდებათ, ადგილების გამოსავლენად მოეწყობა კენჭისყრა
