ფრანგული პსჟ-ს მთავარმა მწვრთნელმა ლორან ბლანმა უარყო გავრცელებული ინფორმაცია, თითქოსდა ის ლონდონის “ჩელსიდან” ნახევარმცველ ედენ აზარის შეძენას აპირებდა.

ფრანგულ პრესაში აქტიურად განიხილავდნენ ვარიანტს, რომლის მიხედვითაც 23 წლის ბელგიელი ზაფხულის სატრანსფერო პერიოდში პარიზული კლუბის მთავარი სატრანსფერო სამიზნე იქნებოდა. აღნიშნულთან დაკავშირებით ბლანმა Le Parisien-ს განუცხადა:

“აზარი? ყველამ გაიგეთ, რომ პსჟ არ აპირებს მსოფლიოს ყველა უძლიერესი ფეხბურთელის შეძენას. შესაძლოა, ჩვენ მხოლოდ ერთ-ერთი მოთამაშე შევიძინოთ” - განაცხადა ბლანმა.

აღსანიშნავია, რომ კლუბის გამოცვლაზე არც თავად ფეხბურთელი ფიქრობს: “ჩელსიში” ყველანაირი პირობით კმაყოფილი ვარ და ვიმედოვნებ, აქ ძალიან დიდხანს დავრჩები”.

პრემიერლიგის მიმდინარე გათამაშებაში აზარმა “ჩელსის” მაისურით 21 შეხვედრა ჩაატარა, 9 გოლი გაიტანა და 5 შედეგიანი გადაცემა გააკეთა.