ფორმულა 1-ის მსოფლიოს ჩემპიონატის კალენდარი თითქმის ყოველწლიურად ახალი ეტაპებით ივსება. მალე, მასში ინდოეთის, აშშ-ისა და რუსეთის დიდი პრიზები გამოჩნდება. და არაა გამორიცხული, რომ ამის გამო, ზოგიერთმა ძველმა რბოლამ, კალენდარში ადგილი დაკარგოს. მათ შორის კი, ყველაზე არამყარი მდგომარეობა ბელგიურ დიდ პრიზს აქვს, რომელსაც ფორმულა 1-ის მენეჯმენტთან კონტრაქტი მომავალი სეზონის ბოლოს უმთავრდება.
ბელგიის დიდი პრიზის ორგანიზატორები ყოველწლიურად ზარალს განიცდიან. გასულ სეზონში მათ 4,5 მილიონი ევრო იზარალეს. ვარაუდობენ, რომ ჩემპიონატში ბელგიელი ჟერომ დ’ამბროზიოს გამოჩენა, ბელგიური რბოლისადმი ადგილობრივი მაყურებლის ინტერესს გაზრდის. თუმცა, ამაში ეჭვი ეპარება სპას რბოლის შეფ ანდრე მაესს.
”რა თქმა უნდა, ფ1-ში მისი მოსვლა დადებითი სიახლეა. მაგრამ საეჭვოა, ამან ბილეთების გაყიდვას შეუწყოს ხელი. თავის დროზე, ”ლოტუსში” მყოფი ფილიპ ადამსის სანახავად ბევრი მაყურებელი არ მოდიოდა. მაყურებლის რიცხვი არც მაშინ გაზრდილა, როცა 2004 წელს, თავისუფალ პრაქტიკებზე, ”მინარდის” ბოლიდით ტრასაზე ბას ლაინდერსი გამოდიოდა.
ვფიქრობ, დ’ამბროზიოს ჩვენს რბოლაზე ბილეთების გაყიდვის გაზრდა მხოლოდ იმ შემთხვევაში შეუძლია, თუ სეზონის დასაწყისიდანვე კარგი შედეგები ექნება. ამჟამად, ის ეროვნული დონის ვარსკვლავიც კი არაა - დარწმუნებული ვარ, ბელგიელ ტელემაყურებელთა უმეტესობას, მის შესახებ ერთხელაც არ სმენია”, - ამბობს მაესი.
წამგებიანი ბიზნესი იმას ნიშნავს, რომ ბელგიური რბოლა გულზე არ ეხატება ფ1-ის კომერციულ უფლებათა გამგებელ ბერნი ეკლსტოუნს, ვისაც ურჩევნია, ამ ადგილზე სხვა ისეთი ქვეყნის ეტაპი გამოჩნდეს, რომელიც რბოლის ჩატარების უფლებაში გაცილებით მეტ თანხას გადაიხდის.
სხვათა შორის, მომავალი სეზონის შემდეგ, კონტრაქტები ჩინეთის, თურქეთისა და იაპონიის დიდ პრიზებსაც უმთავრდებათ. ამათგან, ყველაზე მყარი პოზიცია იაპონელებს აქვთ, რომელთა რბოლასაც ყოველთვის უამრავი მაყურებელი ესწრება. სამაგიეროდ, წაგებაზე მუშაობენ თურქეთისა და ჩინეთის დიდი პრიზების ორგანიზატორები.

მოამზადა მერაბ ლორთქიფანიძემ

http://formula1ge.blogspot.com/