ქართველმა ნიკოლოზ ბასილაშვილმა და სერბმა მილიან ზეკიჩმა რუმინულ სიბიუში მიმდინარე საერთაშორისო ტურნირის (საპრიზო ფონდი 42 500 ევრო) მეოთხედფინალში უბრძოლველად გააღწიეს.

SIBIU OPEN 2014-ის წყვილთა შეჯიბრის პირველ რაუნდში ბასილაშვილს და ზეკიჩს იტალიელების – მარკო ჩეკინატოს და ფლავიო ჩიპოლას წინააღმდეგ უნდა ეთამაშათ, თუმცა, მეტოქეები კორტზე არ გამოცხადდნენ.

ეს ცოტა უცნაურია, რადგანაც იტალიელები ერთეულების მერვედფინალში ერთმანეთს გაეჯიბრნენ და მატჩი ბოლომდე ჩაათამაშეს. თამაში ჩიპოლამ 2:6, 7:5, 6:0 მოიგო.

ისიც ვთქვათ, რომ მეოთხედფინალში ქართველი და სერბი ჩოგბურთელების მეტოქეთა ვინაობა ჯერაც არ გარკვეულა. ნიკოლოზი და მილიანი იტალიელი სტარაჩეს და რუმინელი უნგურის და რუმინელების – გეორგეს და სულეას მატჩის დასრულებას ელიან.