ანტალიაში ვაჟთა 10-ათასიან ტურნირში წარმატებულად ირჯება ვაჟთა შორის საქართველოს პირველი ჩოგანი ნიკოლოზ ბასილაშვილი. მან ასპარეზობა კვალიფიკაციიდან დაიწყო, სადაც მე-2 განთესვა გააჩნდა. ნიკოლოზმა საწყისი რაუნდი გამოტოვა, შემდეგ კი ფრანგ ალექსანდრ დავიდს და შვეიცარიელ ადრიან ბოდმერს, შესაბამისად, 6:4, 6:0 და 6:4, 1:6, 6:4 მოუგო.

ძირითადი ბადის პირველ შეხვედრაში ბასილაშვილმა გერმანელი პირმინ ჰაენლე 6:3, 2:6, 6:2 დაამარცხა და მერვედფინალში რუს ანდრეი პლოტნისთან ჭიდილი ელის.

წყვილთა ტურნირში მე-2 ნომრად განთესილმა ბასილაშვილმა და ამერიკელმა ადამ მიჰდავიმ უკრაინელ იური კრივოის და ლიტველ ლუკას მუგევიჩიუსს 6:2, 5:7, 11:9 სძლიეს და მეოთხედფინალში გერმანელებს – ტომ შონენბერგს და ლენარტ ზინგას დაუპირისპირდებიან.

ანტალიაშივე გოგონათა 10-ათასიანი ტურნირის პირველ რაუნდში მე-8 ნომრად განთესილმა სოფო ქვაცაბაიამ კვალიფიკაციის გამარჯვებული გერმანელი ჯილ ნორა ენგელმანი 6:3, 6:3 დაამარცხა და მერვედფინალში გააღწია, სადაც ბელგიელ კიმბერლი ციმერმანს ეთამაშება.

წარმატებას მიაღწია მე-4 რეიტინგის მქონე ეკატერინე გორგოძემაც. მან თურქი ესენ კოკჩე 6:0, 6:0 გაანადგურა და შემდეგ წრეში მაროკოელ რიტა ატიკს და იაპონელ იოშიმი კავასაკის შორის უმჯობესს დაუპირისპირდება.

პირველი რაუნდის მატჩი ჯერაც წინ აქვს ანა ქადაგიძეს. მისი მეტოქე უკრაინელი ანასტასია შესტაკოვა იქნება.

წყვილთა ტურნირის მეოთხედფინალში მე-4 განთესვის მქონე გორგოძე და უკრაინელი ზაკარლიუკი იაპონელებს – ჰანატანის და კავასაკის გაეჯიბრებიან, ხოლო ქვაცაბაია და თურქი კოკჩე ძალებს ბელგიურ დუეტთან (მარი ბენუა-კიმბერლი ციმერმანი, მე-3) მოსინჯავენ. ქადაგიძე და სლოვაკი ვიკტორია კუზმოვა რუმინელ ანა და იოანა ბოგდანებთან 3:6, 4:6 დამარცხდნენ.

ბრიტანულ ლოჰბოროში მიმდინარე 10-ათასიანი კვალიფიკაცი დასძლია მარიამ ბოლქვაძემ. მე-2 ნომრად განთესილმა ქართველმა ჩოგბურთელმა საწყის წრეში დაისვენა, შემდეგ კი მასპინძელ ფარა აბდელაზიზს 6:1, 6:3 მოუგო. ძირითად ბადეში ბოლქვაძე ასევე კვალიფიკაციის გამარჯვებულ გერმანელ ნორა ნიედმერს ვერ გაუმკლავდა – 5:7, 3:6.

წყვილებში ბოლქვაძე და ბრიტანელი ჯასმინ ამბერ აშგარი იტალიელ მარია მასინის და ბელარუს დარია შულჟანოკს ეთამაშებიან.