პრიმერადივიზიონის გასულ ტურში, “ბარსელონას” “რეალ სოსიედადთან” წაგების (1:3) შემდეგ ესპაური გამოცემები კატალონიური კლუბის მთავარ მწვრთნელ ხერარდო მარტინოს ბარსელონურ პერსპექტივაზე ალაპარაკდნენ. სპეციალისტი გუნდს სავარაუდოდ მიმდინარე სეზონის დასრულების შემდეგ დატოვებს, თუმცა ამის შესახებ ოფიციალური განცხადება ჯერ არავის გაუკეთებია.
ერთ-ერთი სააგენტოს ცნობით, რომელიც კულუარულ ინფორმაციას ეყრდნობა, “ბარსელონას” ხელმძღვანელობამ ხერარდო მარტინოს შემცვლელის ძებნა უკვე დაიწყო და კლუბის სპორტულ დირექტორ ანდონი სუბისარეტას პოტენციური კანდიდატების სიაც აქვს ჩამოწერილი. ამ სიაში არიან ერნესტო ვალვერდე, ლუის ენრიკე, ანდრე ვილაშ-ბოაში, დიეგო სიმეონე და იურგენ კლოპი.
