ერთტურიანი შესვენების შემდეგ, ქართველმა მოჭადრაკე ნინო ბაციაშვილმა (2419), რომელიც პოლონეთის ქალაქ ვროცლავში მიმდინარე საერთაშორისო ტურნირზე თამაშობს, ერთპიროვნული ლიდერობა დაიბრუნა.

მე-6 ტურში ბაციაშვილმა თეთრი ფიგურებით ტურნირის რეიტინგ-ფავორიტი სომეხი ლილიტ მკრტჩიანი (2469) დაამარცხა, 4.5 ქულა მოაგროვა და უახლოეს კონკურენტს, პოლონელ იოანა მაიდან-გაიევსკას (2384) ნახევარი ქულით გაუსწრო.

წარმატებული დღე ჰქონდა ტურნირის მე-2 ქართველ მონაწილე სოფიკო გურამიშვილსაც (2431). მან შავებით კიდევ ერთი მასპინძელ იოლანტა ზავადსკას (2377) აჯობა და 3.5 ქულით მე-3 ადგილზე გადაინაცვლა.

ვროცლავის ტურნირი, რომელიც კრისტინა ჰოლუი-რაძიკოვსკას სახელობის გახლავთ, 9 ტურად მიმდინარეობს და 6 ოქტომბერს დასრულდება. მე-7 ტურში პოლონეთში ქართულ დაპირისპირებას ვიხილავთ – გურამიშვილი ბაციაშვილს თეთრი ფიგურებით ეთამაშება.