აზერბაიჯანის ჩემპიონატში, კახა ცხადაძის გაწვრთნილმა ბაქოს “ინტერმა” გასვლაზე 5:1 სძლია “რავანს” და 3 გოლი ბაჩანა ცხადაძემ გაიტანა, თანაც 13-წუთიან მონაკვეთში: 30-დან 43-ე წუთამდე. თავიდან “რავანი” იგებდა, “ინტერმა” გაათანაბრა და შემდეგი სამი გოლი უკვე ქართველი ფორვარდისა იყო.

ბაჩანამ და ალექსანდრე იაშვილმა თავიდან ბოლომდე ითამაშეს, გიორგი ლომაია სათადარიგო გახლდათ, ხოლო ლაშა სალუქვაძეს ტრავმა აქვს და 18-კაციან განაცხადში არ გახლდათ. ეს “ინტერის” პირველი მოგებაა – საწყისი 3 ტურის შემდეგ,  გუნდი უქულოდ იყო.

ლიდერმა “ყარაბაღმა” გასვლაზე 1:0 აჯობა “გაბალას” და მაქსიმუმი, 12 ქულა აქვს. ნიკა გელაშვილი განაცხადში არ გახლდათ.

რუსეთის პრემიერლიგაში სამარის “კრილიამ” გასვლაზე ქულა აიღო “რუბინთან” – 1:1. ალეკო ამისულაშვილმა და გია გრიგალავამ შეუცვლელად ითამაშეს, ყაზანელთა მცველი საბა კვირკველია სათადარიგო გახლდათ. 6 ტურის შემდეგ, “რუბინი” მერვე საფეხურზეა, “კრილია” კი – მეთორმეტეზე.

უკრაინულ პრემიერლიგაში მოხდა იშვიათი შემთხვევა: დონეცკის “შახტარმა” წააგო. უკრაინული გრანდის დამარცხება “დნიპრომ” მოახერხა – 3:1. ჯაბა კანკავამ შეუცვლელად ითამაშა, ხოლო სანდრო კობახიძე და უჩა ლობჟანიძე განაცხადს მიღმა დარჩნენ. კანკავამ კარგი მატჩი ჩაატარა. პირველ ნახევარში ჯაბამ ყვითელიც მიიღო. “დნიპრო” მესამე ადგილზეა.