საქართველოს ძიუდოისტთა ნაკრების წევრებისთვის აბუ დაბის გრან-პრის პირველი დღე წარუმატებელი გამოდგა. დღეს მედლები მამაკაცებს შორის პირველ სამ წონით კატეგორიაში: 60, 66 და 73 კილოგრამებში უნდა გათამაშდეს. ქართველი ძიუდოისტები კი ბრძოლას საწყისი ეტაპიდან გამოეთიშნენ. შეგახსენებთ, მთავარმა მწვრთნელმა ირაკლი უზნაძემ სატურნირო განაცხადი ძირითადად ახალგაზრდა სპორტსმენებით შეავსო.

ლერი ჭელიძე (60 კგ) შეჯიბრებაში მეორე წრიდან ჩაერთო და უმალ იპონით დამარცხდა ბრაზილიელ დიეგო სანტოსთან. გიორგი ქალდანიც (66 კგ) ერთადერთხელ გავიდა ტატამზე და მანაც სუფთად წააგო მონღოლ ალტანსუხ დოვდონთან. ამავე წონით კატეგორიაში ვაჟა მარგველაშვილმა გრან პრი ამერიკელი მაიკლ ვალენტინის ადვილად ძლევით გახსნა, მაგრამ რუსეთის ნაკრების გამოცდილ წევრ ალიმ გადანოვთან ვეღარას გახდა.

73 კილოგრამში მოჭიდავე ზურაბ ნოზაძემაც ერთი წრის დაძლევა შეძლო – რუმინელ რობერტ ფლორიან პაპს ჯერ იუკო აუღო, შემდეგ კი წმინდადაც მოუგო. არაბეთის გაერთიანებული საემიროების ნაკრების გამოცდილ წევრთან ვიქტორ სკვორცოვთან კი ოქროს დროში გაფრთხილებით დამარცხდა.

ხვალ საქმეში 81, 90, 100 და +100 კილოგრამში მოჭიდავეები ჩაერთვებიან. საქართველოს ნაკრებს პაატა ღვინიაშვილი (90 კგ) და როსტომ ხახალეიშვილი (+100 კგ) წარმოადგენენ. ორ წონაში კი ქართულ გუნდს მონაწილე არ ეყოლება.