მადრიდის “ატლეტიკო”, რომელიც ესპანეთის პრიმერა დივიზიონისა და ჩემპიონთა ლიგის მოსაგებად იბრძვის, თავდამსხმელ დიეგო კოსტას შესაძლო დაკარგვის შემთხვევაში, მის სრულფასოვან შემცვლელს ეძებს.
მადრიდელთა საუკეთესო ბომბარდირის მიმართ ინტერესს მდიდარი ევროპული კლუბები იჩენენ და დიდი ალბათობით, ზაფხულში ის ახალ გუნდს მიაშურებს. ასეთი სიტუაცია პრიმერა დივიზიონის ლიდერს შედეგიანი ფორვარდის ძებნას აიძულებს.
AS-ის ცნობით, “ატლეტიკო” ბრაზილიური “სანტოსის” ფორვარდ ლეანდრო დამიაოს აკვირდება. წყარო იმასაც ირწმუნება, რომ ესპანელებმა ბრაზილიურ კლუბს ქვეყნის ეროვნული ნაკრების 24 წლის ფეხბურთელის სანაცვლოდ 13 მილიონი ევრო უკვე შესთავაზეს. დამიაო ბრაზილიური “ინტერნასიონალიდან” “სანტოსში” 2013 წლის დეკემბერში, 13,5 მილიონი ევროს სანაცვლოდ გადავიდა.
