ამერიკის შეერთებული შტატების ნაკრები ფინეთს რომ მოუგებდა, ეჭვი არავის ეპარებოდა, მაგრამ მსოფლიოს ჩემპიონატის უპირველესი ფავორიტი სუომელთა ნაკრებს ასე თუ გაამასხრებდა, მაინც ძნელი წარმოსადგენი იყო. თავად განსაჯეთ, ბილბაოს “ბისკაია არენაზე” ჯერ მხოლოდ პირველი ტაიმი დასრულდა, ამერიკელთა უპირატესობამ კი უკვე 42 ქულას უწია (60:18).

თავიდან სკანდინავები ასე თუ ისე წინააღმდეგობას უწევდნენ მეტოქეს (ანგარიში 4:4 იყო) და საწყისი მეოთხედი მხოლოდ 15 ქულით (16:31) წააგეს, მეორე პერიოდში მომხდარს კი რა ვუწოდოთ, არ ვიცით - ამერიკელებმა ეს ათწუთიანი მონაკვეთი... 29:2 მოიგეს.