ლონდონის “არსენალის” მთავარი მწვრთნელის, არსენ ვენგერის აზრით, მიმდინარე სეზონში, პრემიერლიგაში გამარჯვების შანსი, ერთბაშად შვიდ გუნდს აქვს.
ექვსი ტურის შემდეგ, ვენგერის შეგირდები სატურნირო ცხრილის სათავეში არიან, მაგრამ ფრანგი სპეციალისტი მიიჩნევს, რომ საჩემპიონო რბოლა ადვილად პროგნოზირებადი არ იქნება.
“ჩემპიონობის შანსი გვაქვს, მაგრამ ბრძოლა ძალიან ღიაა. ჩვენ წინსვლა ასეთივე მონდომებით უნდა გავაგრძელოთ. გასული სეზონის საუკეთესო ოთხეულს (“მანჩესტერ იუნაიტედი”, “მანჩესტერ სიტი”, “ჩელსი” და “არსენალი) შეგვიძლია “ლივერპული”, “ტოტენჰემი” და “ევერტონი” დავამატოთ. ეს ძალიან საინტერესო იქნება. ახლა, სეზონის ძალიან ადრეული სტადიაა და მხოლოდ 6 მატჩი ჩავატარეთ. თუმცა, პირველ ტურში დამარცხების შემდეგ 15 ქულის მოპოვებით, ბედნიერი ვარ. წინა წლებთან შედარებით რა შეიცვალა? ამჟამად, შესაძლებლობების 80 პროცენტით თამაში, პრემიერლიგის ნებისმიერი გუნდის დასამარცხებლად საკმარისი არაა. მინიმუმ, 95-100 პროცენტით უნდა დაიხარჯო და ეს, ძალიან საინტერესო სეზონს გვიქადის”, – იუწყება ვენგერის სიტყვებს გამოცემა Daily Mirror-ი.
