ესპანეთის საკალათბურთო ჩემპიონატის მე-16 ტურში გიორგი შერმადინის და ვიქტორ სანიკიძის “სარაგოსა” ვიტორიას ესტუმრა და ფავორიტად მიჩნეულ “ლაბორალ კუტხასთან” 83:92 წააგო.
ქართველ კალათბურთელთა გუნდი შეხვედრის დასაწყისში სოლიდურად ჩამორჩა, თუმცა, მდგომარეობის გამოსწორება მოახერხა და საფინალო სირენამდე რამოდენიმე წუთით ადრე, მეტოქეს ქულამდე დაუახლოვდა.
არაგონელთათვის სამწუხაროდ, დასკვნითი პერიოდი ბასკებმა უკეთ ჩაატარეს და სეზონში მე-9 გამარჯვება იზეიმეს, “სარაგოსამ” კი 8 მოგების ფონზე მე-8 მარცხი განიცადა და სატურნირო ცხრილში მე-9 პოზიციაზე აღმოჩნდა.
გასულ მატჩში ორივე ქართველი სასტარტო ხუთეულში იყო, თუმცა, ჩვეულად დიდი დრო არ დათმობიათ. შერმადინმა მოედანზე 15:40 წუთი გაატარა და 13 ქულა და 4 მოხსნა მიითვალა.
ქართველმა ცენტრმა 7-დან 5 ორქულიანი და 4-დან 3 საჯარიმო ჩააგდო, ბურთი 3-ჯერ დაკარგა, მის წინააღმდეგ 3-ჯერ დაჯარიმდნენ, თავად კი სათადარიგოთა სკამზე 5 პერსონალური ფოლის მიღების შემდეგ გადაინაცვლა.
უქულოდ დაასრულა მატჩი სანიკიძემ, რომელმაც 12:46 წუთში სამივე სამქულიანი ააცილა. ვიქტორის აქტივში 1 პასი, 1 ჩაჭრა და 2 დაფარება იყო, ერთხელ დაჯარიმდა და მის წინააღმდეგაც თამაშის წესები ერთხელ დაირღვა.
შერმადინის გარდა, სტუმართაგან 10-ქულიან ზღვარს 3 კალათბურთელი ასცდა. ხორვატმა დამიან რუდეზმა 16 ქულა ჩააგდო, პედრო ლომპარტმა – 12, ხოლო ამერიკელმა მაიკლ როლმა – 11.
ქართველთა კლუბს ესპანეთის ჩემპიონატში მორიგი შეხვედრა 25 იანვარს შინ “მურსიასთან”
კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია