ქართველი ეკატერინე გორგოძის და რუმინელი დიანა ბუზეანის წყვილმა ანტალიის 10-ათასიანი ტურნირის საწყისი რაუნდი იოლად დასძლია.

გორგოძემ და ბუზეანმა “უაილდ ქარდის” მქონე ამერიკელები ჯაედა და ჯანეზ დანიელები 6:2, 6:0 დაამარცხეს და მეოთხედფინალში ჩინელებს – ქსიაორონგ დონგს და ლინ ჟუს ეთამაშებიან.

მეოთხედფინალშივე უკრაინელ ოლენა კირპოტთან და სლოვენიელ ტიასა შრიმპფთან ჭიდილი ელით მე-3 განთესვის მქონე სოფო ქვაცაბაიას და ავსტრიელ პია კიონიგს.

თუკი ქართველთა წყვილებმა მომდევნო ეტაპი წარმატებით დასძლიეს, ნახევარფინალში გორგოძე და ქვაცაბაია ერთმანეთის პირისპირ დადგებიან.

შეგახსენებთ, რომ ქართველი ჩოგბურთელები ანტალიაში ერთეულთა ტურნირშიც ასპარეზობენ. მერვედფინალში მე-2 ნომრის მქონე გორგოძე ჩინელ დონგს გაეჯიბრება, ხოლო ქვაცაბაიას მეტოქე ასევე ჩინელ ჟაოქსუან იანგი იქნება.