22 წლის ანდრე შურლე დასავლეთლონდონის “ჩელსის” სრულუფლებიანი წევრი გახდა. “ლევერკუზენის” ყოფილმა წევრმა “არისტოკრატებთან” ხუთწლიანი კონტრაქტი გააფორმა და ჟურნალისტებსაც თავისი პირველი ლონდონური ინტერვიუ მისცა.

- ანდრე, გილოცავთ “ჩელსიში” გადმოსვლას. ბოლო რამდენიმე თვის განმავლობაში თქვენზე ბევრს საუბრობდნენ. ლონდონურ კლუბში თამაშს ადვილად დაყაბულდით?

- პრაქტიკულად ყველა გაზეთი თავის, სხვებისგან განსხვავებულ ვერსიას სთავაზობდა მკითხველს, ამიტომაც მოხარული ვარ, ბოლოს და ბოლოს ტრანსფერს წერტილი რომ დაესვა. იმედია, “ჩელსიში” ბევრ წარმატებულ სეზონს გავატარებ.

- ჯერჯერობით მთელი კარიერა გერმანიაში გაატარეთ. რამდენად ინფორმირებული ხართ მთლიანობაში ინგლისურ პრემიერლიგაზე და კონკრეტულად “ჩელსიზე”?

- ინგლისურ უპირველეს საფეხბურთო დივიზიონს ძალიან კარგად ვიცნობ. ყოველ უქმეებზე პრემიერლიგის მატჩებს თვალს ვადევნებდი. ცხადია, ყველა ფეხბურთელის სათამაშო სტილს ბოლომდე არ ვიცნობ, მაგრამ მთლიანობაში გუნდებზე მეტ-ნაკლებად სრული წარმოდგენა მაქვს. ჩემთვის მეტად საინტერესოა საკუთარი თავის გამოცდა და წარმოჩენა ახალ ეტაპსა და გათამაშებაში. კონკრეტულად “ჩელსის” რაც შეეხება, რაფა ბენიტესის დამოძღვრილი გუნდის პრაქტიკულად ყველა მატჩი ვნახე. “ჩელსიმ” მძლავრად დაასრულა სეზონი – ევროპის ლიგის თასი მოპოვებას პრემიერლიგაში მესამე ადგილიც მიაყოლა, რაც ჩემპიონთა ლიგის ჯგუფურ ეტაპზე მოხვედრის ტოლფასია. ამის გათვალისწინებით, ლონდონში გადმოსვლა მსურდა და საწადელი ამისრულდა.

- “ჩელსის” მთავარ მწვრთნელად დაბრუნების შემდეგ ჟოზე მოურინიოს პირველი შენაძენი თქვენ ხართ. პორტუგალიელეთან გასაუბრება უკვე მოასწარით?

- მოუთმენლად ველი მოურინიოსთან მუშაობის დაწყებას. რამდენიმე კვირის წინათ იგი მიხაელ ბალაკის გამოსამშვიდობებელ მატჩზე გავიცანი. პორტუგალიელმა მირჩია სადაა უმჯობესი ვიცხოვრო და ამიხსნა, რას ელის ჩემგან. სეუ ჟოზესთან ურთიერთობა სასიამოვნოა და პირველივე ნახვიდან შეატყობ, ძლიერი პიროვნება რომაა. მის სამწვრთნელო ტალანტზე კი არაფერს ვიტყი – ჩემთვის დიდი პატივია მოურინიოს ხელმძღვანელობით ვარჯიში და თამაში.

- ბალაკის გამოსამშვიდობებელმა შეხვედრამ რა გამოცდილება შეგძინათ?

- ამგვარ ღონისძიებაში მონაწილეობის მიღება მეტად საპატიო მისიაა. დიდიე დროგბასა და მაიკლ ესიენის გვერდიგვერდ ვითამაშე, რაც პირადად ჩემთვის ბედნიერებაა.

- ლევერკუზენში ბალაკის მხარდამხარ ასპარეზობდით. როდესაც “ჩელსიში” გადმოხვედით, მას რჩევისთვის მიმართეთ?

- “ჩელსიში” გადმოსვლა სწორედ მან მირჩია, რადგანაც ეს უდიდესი ისტორიის მქონე კლუბია. ბალაკი მარწმუნებდა, რომ “სტემფორდ ბრიჯზე” ბრწყინვალე გულშემატკივრები იყრიან თავს, კლუბში მომუშავე პერსონალი კი საკუთარ საქმეს მაღალპროფესიულად უძღვება. მიხაელი მთელი ჩემი საფეხბურთო კარიერის განმავლობაში დიდ დახმარებას მიწევდა და მან კარგად იცის, რაა ჩემთვის უმჯობესი. მალე ბალაკი ლონდონში ჩამოვა, დამეხმარება საბინაო საკითხის მოწყობაში და კლუბის პერსონალსაც გამაცნობს.

- როგორ გგონიათ, ახალ სეზონში “ჩელსის” შესწევს ძალა პრემიერლიგისა და ჩემპიონთა ლიგის თასის მოსაგებად?

- ამაში ეჭვიც არ მეპარება. “ჩელსი” უმაღლესი კლასის ფეხბურთელებით დაკომპლექტებული გუნდია. მოურინიოს ხელმძღვანელობით თამაშის კიდევ უფრო დახვეწას და წინსვლას მოვახერხებთ. გპირდებით, ბრწყინვალე სეზონი გვექნება.

- “ჩელსის” ფეხბურთელთაგან რომელს იცნობთ?

- ჯერჯერობით ამ მხრივ დასაკვეხნად არ მაქვს საქმე. შევხვდი ორიოლ რომეუს და გავისაუბრეთ. ვიცნობ მარკო მარინს, გასულ სეზონში კევინ დე ბრუინის წინააღმდეგ მითამაშია. მაიკლ ესიენი ბალაკის საბენეფისო მატჩის მსვლელობისას გავიცანი.

- კლუბის კობჰემის საწვრთნელმა ბაზამ თქვენზე რა შთაბეჭდილება მოახდინა?

- მოხიბლული ვარ. აქაური ატმოსფერო ისე მომეწონა, ერთი სული მაქვს, როდის გავალ სავარჯიშოდ.

- ლევერკუზენში დიდწილად მარცხენა ფლანგზე თამაშობდით, “მაინცში” კი ცენტრში. აქედან ცხადია, უნივერსალური ტიპის მოთამაშე ხართ. თავად როგორ დაგვიხასიათებდით საკუთარ საასპარეზო მანერას?

- შეტევის ნებისმიერ პოზიციაზე შემიძლია გამოსვლა, მაგრამ მეჩვენება, რომ უმჯობესია მარცხნივ ვითამაშო. ისე კი, თავს უნივერსალურ ფეხბურთელად ვთვლი და დაცვაშიც შემიძლია გუნდისთვის სარგებლობის მოტანა.

- “ჩელსიში” მაღალი კლასის და გამოცდილ შემტევთა ნაკლებობა ნამდვილად არ იგრძნობა. ავიღოთ მაგალითისთვის ოსკარი, ხუან მატა, ედენ აზარი... როგორ გგონიათ, მათი პარტნიორობა თქვენი თამაშის შემდგომ გაუმჯობესებასაც შეუწყობს ხელს?

- რასაკვირველია, ისინი ძალიან მაღალი დონის მოთამაშეები არიან. თქვენ მათი გამოცდილება ახსენეთ, ამასთან, ისინი ახალგაზრდებიც არიან. ამგვარი დონის პროფესიონალებთან ერთად ვარჯიში საოცნებოა. კლუბში მრავლად არიან გამობრძმედილ ფეხბურთელთა მთელი პლეადის წარმომადგენლები. ფრენკ ლამპარდის, ჯონ ტერის, პეტრ ჩეხის, ეშლი კოულის ავტორიტეტი და საფეხბურთო ცოდნა მისაბაძია. ესენი ხომ “ჩელსის” ლეგენდები არიან. მათ თამაშს ბავშვობიდან ვადევნებდი თვალყურს. ხომ წარმოგიდგენიათ, რას ნიშნავს ჩემთვის ამ ფეხბურთელებთან ერთად ასპარეზობა და მათი პარტნიორობა!

- პირადად თქვენი სამომავლო მიზანს ხომ ვერ გაგვიმხელთ?

- საკუთარ ამოცანას გუნდისგან განცალკევებით არ განვიხილავ. “ჩელსის” ბევრი შეუძლია როგორც ინგლისის პრემიერლიგასა და თასებზე, ასევე ჩემპიონთა ლიგაში. დარწმუნებული ვარ, გუნდი წარმატებას მიაღწევს და ამ საქმეში საკუთარი წვლილის შეტანა მსურს.