ქალთა რეიტინგის ლიდერმა სერენა უილიამსმა ავსტრალიის ღია ჩემპიონატის წლევანდელ გათამაშებაზე გამოსვლა მერვედფინალში დაასრულა. უილიამს-უმცროსმა პირველი სეტი კი მოუგო სერბ ანა ივანოვიჩს (6:4), მაგრამ მომდევნო 2 პარტიაში ბალკანელმა ერთნაირი ანგარიშით 6:3 იმარჯვა და კარიერის განმავლობაში მეორედ გავიდა ავსტრალიის პირველობის მეოთხედფინალში. ანამ სერენას ზედიზედ 25 მოგებულ შეხვედრათა მწკრივი შეწყვიტა.

 ივანოვიჩმა პირველად მოახერხა სერენას დამარცხება (წინა 4 დაპირისპირება ამერიკელის მოგებით დასრულდა), მატჩის შემდეგ კი განაცხადა, ჩემი მოწინააღმდეგე უდიდესი ჩოგბურთელია და მისი ძლევა იმის მანიშნებელია, ჩემმა შრომამ უკვალოდ რომ არ ჩაიარაო.

სერენას რაც შეეხება, მან წელის ტკივილზე წაიწუწუნა და თქვა, ტრავმის გამო ჯერ კიდევ წინა მატჩი უნდა შემეწყვიტაო.