გიორგი ალავერდაშვილმა მორიგი გოლი გაიტანა ლიტვის ჩემპიონატში. "შიაულაის" ქართველმა ფორვარდმა 24-ე წუთზე გაუტანა "კრუოიას", თუმცა მატჩი 1:1 დასრულდა. 8 მატჩი, 9 გოლი - ასეთია ალავერდაშვილის მონაგარი ლიტვის ჩემპიონატის მიმდინარე სეზონში. ამას გარდა, მან თასზეც გაუტანა ჩემპიონ "ეკრანასს".
ალავერდაშვილის "შიაულაი" მე-5 ადგილზეა. აღსანიშნავია, რომ გიორგიმ ეს სეზონი სწორედ "კრუოიაში" დაიწყო და 4 გოლის გატანაც მოასწრო, თუმცა კლუბს ფინანსური პრობლემების გამო მოუწია წამყვანი ფეხბურთელების გაშვება.
ლვოვის "კარპატიმ" შინ 2:0 სძლია ლუგანსკის "ზორიას". მასპინძელთაგან ბუბა დაუშვილმა შეუცვლელად ითამაშა და საკმაოდ აქტიურიც იყო - ორჯერ კარშიც დაარტყა სახიფათოდ. ლევან ყენია განაცხადში არ გახლდათ: ყვითელი ბარათები დაუგროვდა.
"ზორიას" ნახევარმცველი ჯაბა ლიპარტია 64-ე წუთზე გამოჩნდა მინდორზე და 7 წუთში თითქმის პირისპირ დარჩა მეკარესთან, თუმცა ქართველმა ვერ იმარჯვა - მეკარემ დაასწრო.
"კარპატი" მე-12 ადგილზეა, "ზორია" კი ერთი საფეხურით წინაა.
იტალიის სერია B-ში "ემპოლიმ" შინ 1:0 აჯობა "ჩეზენას" და მე-4 პოზიციაზეა. ლევან მჭედლიძე 18 კაცში გახლდათ, თუმცა მინდორზე არ შეიყვანეს. ირაკლი შეყილაძე კი განაცხადს მიღმა დარჩა.
თურქეთში საშინაო მარცხი განიცადა შოთა არველაძის გაწვრთნილმა "ქასიმფაშამ", კერძოდ, შინ 1:2 წააგო "ესქიშეჰირსფორთან". შოთას გუნდი იგებდა და მეორე ნახევარში გაუშვა 2 გოლი, აქედან, მეორე ბოლო წუთზე - პენალტით. "ქასიმფაშა" მე-5 ადგილზეა.
აქვე, აზერბაიჯანზეც: კახა ცხადაძის გაწვრთნილმა "ინტერმა" თანაქალაქელ "ნეფთჩისთან" 0:2 წააგო და ჩემპიონობის მიზერული შანსიღა დარჩა. "ინტერი" მე-3 ადგილზეა და 7 ქულით ჩამორჩება "ნეფთჩის", ხოლო 4 ქულით - "ყარაბაღს". წინ კი მხოლოდ 4 ტურია.
"ინტერიდან" სასტარტოში იყვნენ გიორგი ლომაია, ილია კანდელაკი და ბაჩანა ცხადაძე, რომელმაც ბოლო წუთებში ძელს გაარტყა ბურთი.
გიორგი ფოფხაძის "ბაკიმ" შინ 2:1 სძლია გიორგი ჩიხრაძის გაწვრთნილ "სიმურგს". ფოფხაძემ შეუცვლელად ითამაშა. "ბაკი" მე-5 საფეხურზეა და 2 ქულით ჩამორჩება მეოთხეზე მყოფ "სიმურგს".
რუსეთში, საბა კვირკველიამ "რუბინი"-ცსკა-ს მატჩში შეუცვლელად ითამაშა. ყაზანელებმა 2:0 მოიგეს და მე-4 ადგილზე არიან. ტანმაღალი ქართველი მცველი კარგად გამოიყურებოდა და მნიშვნელოვან მოგებაშიც თავისი წვლილი შეიტანა.
