ლიტვის თასის ფინალში, “შიაულიაი”, სადაც ფორვარდი გიორგი ალავერდაშვილი ირჯება, “ჟალგირისთან” პენალტების სერიაში დამარცხდა.

განვლილი დაპირისპირების ძირითადი დრო 3:3 დასრულდა, ხოლო თერთმეტმეტრიანებში “ჟალგირისმა” 8:7 მოიგო.

ქართველი ფეხბურთელი სასტარტო შემადგენლობაში იყო და 101-ე წუთზე შეცვალეს. აქვე გეტყვით, რომ ალავერდაშვილი 9 გოლით ლიტვის ჩემპიონატის ბომბარდირებში მე-2 ადგილზეა და კლაიპედის “ატლანტასის” ფორვარდ ევალდას რაზულისს ერთი ბურთით ჩამორჩება.

რუსეთის პრემიერლიგის 29-ე ტურში, სამარის “კრილია სოვეტოვმა” საკუთარ მოედანზე ყაზანის “რუბინს” 3:1 აჯობა. მასპინძლებში ალექსანდრე ამისულაშვილმა სრულად ითამაშა, ხოლო საბა კვირკველია ყაზანელთა 18-კაციან განაცხადში არ იყო. “რუბინს” 47 ქულა აქვს და 16 გუნდში მე-7 ადგილზეა. “კრილია” 28 ქულით მეცამეტეა და ლიგაში დასარჩენად იბრძვის.

რუსეთის პირველი დივიზიონის 33-ე ტურში, ხაბაროვსკის “სკა-ენერგია”, რომელსაც გიორგი დარასელია წვრთნის, შინ “უფას” უგოლოდ გაეყარა. ხაბაროვსკელთა ქართველი ლეგიონერებიდან გოჩა ხოჯავამ და შოთა გრიგალაშვილმა შეუცვლელად ითამაშეს. მათ მსგავსად, სასტარტოში იყვნენ ლაშა სალუქვაძე და გიორგი ნავალოვსკიც. პირველი მათგანი 56-ე წუთზე შეცვალეს, ხოლო მეორე – 79-ეზე. “სკა-ენერგიას” 52 ქულა აქვს და 17 გუნდში მეოთხეა. ხაბაროვსკელებმა პრემიერლიგაში გადასასვლელ პლეი ოფში თამაში გაინაღდეს.

პრემიერლიგაში მოსახვედრად პლეი ოფში იბრძოლებს ნალჩიკის “სპარტაკიც”, რომელშიც დავით სირაძე და გუჯა რუხაია ასპარეზობენ. ნალჩიკელებმა კალინინგრადის “ბალტიკას” 2:0 მოუგეს და სირაძე თავიდან ბოლომდე მოედანზე იყო. რუხაია ჯერ არ გამოჯანმრთელებულა და გუნდს ვერ ეხმარება. “სპარტაკი” 53 ქულით მესამეა.

აზერბაიჯანის პრემიერლიგის ბოლო ტურში, კახა ცხადაძის მიერ გაწვრთნილმა ბაქოს “ინტერმა” თავის მოედანზე “გაბალას” 1:0 მოუგო. გამარჯვებულებში გიორგი ლომაიამ და ილია კანდელაკმა 90 წუთი იასპარეზეს, ხოლო სასტარტოში მყოფი ბაჩანა ცხადაძე 77-ე წუთზე შეცვალეს. სამატჩო განაცხადში არ იყვნენ ვალერი აბრამიძე, გიორგი ადამია და რევაზ თევდორაძე. “ინტერმა” 57-ე ქულით ჩემპიონატი მე-3 ადგილზე დაასრულა.

ზაქათალის “სიმურგმა”, რომელსაც სათავეში გიორგი ჩიხრაძე უდგას, აგდამის “ყარაბაღს” ესტუმრა და 0:0 ითამაშა. ზაქათალელებმა 48 ქულა დააგროვეს და ჩემპიონატში მე-4 ადგილზე გავიდნენ. ჩიხრაძე გუნდს შარშან ჩაუდგა სათავეში და “სიმურგი” ლიგიდან გავარდნისგან იხსნა, ხოლო წლეულს შედეგი გაცილებით გააუმჯობესა.

ლატვიის ვირსლიგის (უმაღლესი ლიგა) მე-8 ტურში რიგის “დაუგავამ”, რომელშიც გიორგი დიაკვნიშვილი გამოდის, გასვლაზე “მეტას” 2:1 სძლია. ქართველი ნახევარმცველი თამაშში 46-ე წუთზე ჩაერთო. რიგელებს 17 ქულა აქვთ და ბევრისთვის მოულოდნელად, 10-გუნდიან სატურნირო ცხრილში პირველ ადგილზე არიან.

უნგრეთის NBI-ის (უმაღლესი ლიგა) 28-ე ტურში, გაჩემპიონებულმა “დიორ ეტომ” “ჰონვედთან” სტუმრად 0:2 წააგო. “დიორის” რიგებში გიორგი ქვილითაია მოედანზე 50-ე წუთზე შევიდა, მაგრამ 20 წუთში გააძევეს. რატი ალექსიძე 18-კაციან განაცხადში არ იყო.

“კეჩკემეტი” “დიოშდიორს” ეწვია და 1:2 დამარცხდა. გივი იოსელიანი სტუმართა განაცხადში კი იყო, მაგრამ თამაში არ მოუწია. “კეჩეკემეტს” 41 ქულა აქვს და 16 გუნდში მეშვიდეა.

ყაზახეთის პრემიერლიგის მე-11 ტურში, “ატირაუმ” გასვლაზე “აკჟაიკთან” 0:4 წააგო. გიორგი ფეიქრიშვილი ატირაუელთა სასტარტოში იყო და 0:4 წააგო. “ატირაუს” 13 ქულა აქვს და 12 გუნდში მეშვიდეა.

“ჟეტისუ”, რომელსაც ომარ თეთრაძე თავკაცობს, შინაურ კედლებში “ტობოლთან” 1:4 დამარცხდა. თეთრაძის გუნდს 6 ქულა აქვს და ბოლოა.

პორტუგალიის ლიგა დე ონრას (პირველი ლიგა) ბოლო ტურში, “ოლივეირენსე” “ვიტორია გიმარაეშ 2”-თან სტუმრად 0:1 წააგო. “ოლივეირენსეს” სასტარტოში იმყოფებოდა ავთო ებრალიძე, რომელიც 45-ე წუთზე შეცავლეს. განვლილ სეზონში 21 წლის ქართველმა ფორვარდმა 38 მატჩი ჩაატარა, აქედან 28 - სასტარტოში და 2 გოლი გაიტანა. “ოლივეირენსემ” 60 ქულით 22 გუნდში მე-9 ადგილი დაიკავა.

კვიპროსის პირველ დივიზიონში (უმაღლესი ლიგა) ახნის “ეთნიკოსმა” შინ “ ნეა სალამინასთან” 2:2 ითამაშა. მასპინძლებში ლევან მაღრაძე არ შეუცვლიათ.

გერმანიის მე-2 ბუნდესლიგის დასკვნით ტურში, “ზანქტ პაული” “კაიზერსლაუტერნს” ესტუმრა და 2:1 სძლია. გამარჯვებულთა შორის აკაკი გოგია მხოლოდ თადარიგში ყოფნით შემოიფარგლა. უკვე გადაწყვეტილია, რომ “ზანქტ პაული” ქართველ ნახევარმცველს, რომელსაც კონტრაქტი “ვოლფსბურგთან” აკავშირებს, საიჯარო ხელშეკრულებას აღარ გაუგრძელებს. “ზანქტ პაულიმ” თავი 43 ქულას მოუყარა და ჩემპიონატი მე-10 ადგილზე დაამთავრა.

სამხრეთ აფრიკის PშL-ის 30-ე ტურში, “მოროკა სვოლოუსი” თავის მოედანზე “ბლუმფონტეინს” დაუზავდა – 1:1. “მოროკაში” გიორგი ნერგაძე სრულად გაისარჯა. მის გუნდს 40 ქულა აქვს და 16-გუნდიან ჩემპიონატში მეცხრეა.

შვეიცარიის ჩელენჯლიგის 33-ე ტურში, “ბელინცონამ” გასვლაზე “ბილს” 1:0 აჯობა. გამარჯვებულებში გიორგი ივანიშვილი მოედანზე მე-80 წუთზე შევიდა. “ბელინცონა” 68 ქულით 10 გუნდში მეორეა.

ფინეთის იუკონენლიგის (პირველი ლიგა) მე-5 ტურში “ქართული” დერბი შედგა, რომელშიც “კოოტეეპეემ” სახლში “კაიაანის” 1:0 მოუგო. მასპინძლებში გიორგი ოსიტაშვილმა ორივე ტაიმი ითამაშა, ხოლო სტუმრებში კახა სამსონია 46-ე წუთზე გამოჩნდა. “კოოტეეპეე” 10-გუნდიან ჩემპიონატს 10 ქულით ლიდერობს, “კაიაანი” 4 ქულით მეშვიდეა.