ტრავმირებული დ’ორ ფიშერის და კოსტას კაიმაკოღლუს არყოფნაში, “უნიკსის” ქართველ ფორვარდ ვიქტორ სანიკიძეს თავის გამოჩენის შანსი მიეცა და უკვე მე-2 მატჩია, იგი მას ჩინებულად იყენებს.

ევროთასის გასულ ტურში, სანიკიძემ საფრანგეთში “სტრასბურგთან” 18:20 წუთში 10 ქულას, 9 მოხსნა, 1 ჩაჭრა და 1 დაფარება წაამატა, ამჯერად კი, ყაზანელებს ვთბ-ლიგის შეხვედრაში დაეხმარა.

“უნიკსმა” ტალინში “კალევი” 84:69 დაამარცხა, ვიქტორმა კი 24:58 წუთში 12 ქულა, 5 მოხსნა (2 შეტევაში), 2 ჩაჭრა და 3 დაფარება მოაგროვა.

ქართველი ფორვარდი სასტარტო ხუთეულში არ ყოფილა, თუმცა, სათამაშო წუთების მხრივ, სტუმართა რიგებში მე-4 იყო. სანიკიძემ 7-დან 6 ორქულიანი ჩააგდო, 2 სამქულიანი ააცილა, ბურთი ერთადერთხელ დაკარგა, 3 პერსონალური ფოლი მიიღო, მის წინააღმდეგ კი 2-ჯერ დაჯარიმდნენ.

და ყველაზე საინტერესო. “ვიკამ” ძველი “მფრინავი” სანიკიძე გაგვახსენა და ლამის ყველა ქულა “სლემ-დანქებით” მიითვალა...

ჩვენებურის სარგებლიანობის კოეფიციენტმა 18-ს უწია, რითაც იგი მხოლოდ ამერიკელ კიტ ლენგფორდს ჩამორჩა. ამ უკანასკნელმა 24 წუთში 24 ქულა მოაგროვა.

ყაზანელებმა 4 მარცხის წილ მე-9 გამარჯვება იზეიმეს და ვთბ-ლიგაში მე-4 ადგილზე იმყოფებიან, ერთპიროვნული ლიდერი კი მანუჩარ მარკოიშვილის ცსკა გახლავთ, რომელმაც სარატოვში “ავტოდორს” 91:70 სძლია.

ქართველი მცველი მოედანზე 16:32 წუთი გამოჩნდა და 7 ქულა, 2 მოხსნა, 1 პასი და 1 ჩაჭრა მოაგროვა. მანუჩარმა 3-დან 2 სამქულიანი და 2-დან 1 საჯარიმო ჩააგდო, 2 ორქულიანი ააცილა, ერთხელ დაუფარეს, 1 პერსონალური ფოლი მიიღო და მის წინააღმდეგაც ერთხელ დაჯარიმდნენ.

მოსკოველთა რიგებში ყველაზე შედეგიანი სერბი მილოშ ტეოდოსიჩი იყო, რომელმაც მართალია, 10-დან 2 სამქულიანი ჩააგდო, თუმცა, 29:19 წუთში 24 ქულა მაინც მოაგროვა. ცსკა-ს მონაგარი 14 მოგებაა.

11 გამარჯვებით მე-3 პოზიციაზე რჩება ლევან ფაცაციას “ნიჟნი ნოვგოროდი”, რომელიც დღეს ჩეხურ “ნიმბურკს” უმასპინძლებს.