საქართველოს ფეხბურთელთა ეროვნული ნაკრების მეკარემ გიორგი ლორიამ “მსოფლიო სპორტთან” საუბარში განაცხადა, რომ რამდენიმე დღის წინ მიღებული ტრავმა აღარ აწუხებს და პოლონეთთან სათამაშოდ მზადაა.

გიორგი ლორია: “ოთხი დღის წინ, თამაშზე მარჯვენა ხელის ცერა თითი ამომივარდა. თუმცა, საბედნიეროდ ვითამაშე, მიუხედავად იმისა, რომ ტკივილგამაყუჩებელი დამჭირდა. ყველა ოფიციალური თამაში ჩავატარე და სათამაშო პრაქტიკა მაქვს. ფორმაში ვარ”.

- საქართველოს ჩემპიონატის შემდეგ, საბერძნეთის ლიგასთან შეგუება გაგიჭირდათ?

- თავიდან რთული იყო, რადგან ლეგიონერის სტატუსით თამაში პირველად მომიწია. საბერძნეთის ლიგა ბუნდესლიგა ან პრემიერლიგა არაა, მაგრამ ევროპის საუკეთესო ლიგების ათეულში შედის. ძალიან მაღალი სისწრაფეებია, როგორც თამაშებზე, ასევე, ვარჯიშებზე. ოფი კარგი გუნდია. ყველა პირობაა შექმნილი, რომ კარგ ფორმაში ვიყო.

- მერებაშვილის ოფი-ში ტრანსფერში რა წვლილი მიგიძღვით?

- განსაკუთრებული წვლილი არ მიმიძღვის. მის შესახებ აზრი რომ მკითხეს, სიმართლე რაცაა ის ვუთხარი. “დინამოს” აკადემიიდან ერთად მოვდივართ და “მერებას” შესაძლებლობები კარგად ვიცი. “პანათინაიკოსთან” სადებიუტო მატჩში გოლი გაიტანა, მომდევნო შეხვედრაში საგოლე პასი გააკეთა.

- ენობრივი ბარიერი არ შეგექმნათ?

- გუნდში ინგლისური თითქმის ყველამ იცის. ოფი-ში 9 ლეგიონერია და ძირითადი ენა მაინც ინგლისურია. თუმცა, ბერძნულსაც ვსწავლობთ ნელ-ნელა.

- ჯენარო გატუზოს როგორ დაახასიათებთ? მწვრთნელობის დროსაც ისეთივე ჟინიანი, როგორც ფეხბურთელობისას იყო?

- როგორც მინდორზე ფეხბურთელობის დროს იყო, ახლაც თვალებში სულ ცეცხლი უნთია. ძალიან მაგარი პიროვნებაა, ვაჟკაცური. გატუზო ოფი-ში მარტო არაა, იტალიიდან 6 ასისტენტი ჰყავს ჩამოყვანილი. ერთ-ერთი მათგანი “მანჩესტერ იუნაიტედში” ფერგიუსონს ეხმარებოდა. აქედან გამომდინარე, ერთპიროვნულად არ მოქმედებს და აზრს სამწვრთნელო შტაბსაც ეკითხება.

- გატუზო უპირატესობას რა სტილს ანიჭებს?

- თავიდან როდესაც 3-5-2 ტაქტიკით ვთამაშობდით უპირატესობა მოკლე გადაცემებს და ბურთის ხანგრძლივ გათამაშებას ენიჭებოდა. ახლა, 4-4-2-ით ვთამაშობთ და უფრო გრძელ გადაცემებს ვიყენებთ.

- საბერძნეთში ეკონომიკური კრიზისის პერიოდს ჯერ ბოლომდე არ გაუვლია და ოფი-ში როგორი ფინანსური მდგომარეობაა?

- ჩემპიონთა და ევროპის ლიგაზე მოთამაშე გუნდებს დიდი ფინანსური შესაძლებლობა აქვთ და ოფი მათთან ახლოს ვერ მივა.