“ვალენსიას” არგენტინელი ცენტრალური მცველი ნიკოლას ოტამენდი “რეალთან” მოგებული (2:1) მატჩის შემდგომ ჟურნალისტებთან წასდგა და აღნიშნულ შეხვედრაზე ისაუბრა.

არგენტინელი უკანახაზელის თქმით, მისი გუნდი მთელი კვირის განმალობაში ემზადებოდა “რეალთან” შეხვედრისთვის და საბოლოო ჯამში დამსახურებული გამარჯვებაც მოიპოვა.

“უმნიშვნელოვანესი 3 ქულა მოვიპოვეთ და ახალი წელი შესანიშნავად დავიწყეთ, ისევე როგორც წინა დავასრულეთ. მადრიდელებთან მატჩისთვის მთელი კვირის განმალობაში ვემზადებოდით. ჩვენ ყველაფერი გავიღეთ და დამსახურებულად გავიმარჯვეთ.

ძალიან ახალგაზრდული გუნდი გვყავს, თუმცა უკვე გვაქვს საჭირო გამოცდილება. ბევრი გაფრთხილებების მიუხედავად, ძალიან ფრთხილად და სწორად ვთამაშობდით, რითაც მეტოქეს საკუთარი თამაშის საშუალება არ მივეცით”- განაცხადა გუშინდელი მატჩის გმირმა, რომლის გოლითაც “ვალენსიამ” 2009 წლის შემდეგ პირველად მოუგო “რეალს”.

შეგახსენებთ, რომ “ვალენსიამ” გუშინდელი გამარჯვებით “რეალის” 22-მატჩიანი მოგებათა სერია შეწყვიტა.