2015/16 წლების სეზონს “ლივერპული” სტივენ ჯერარდის გარეშე დაიწყებს. “ლივერპულის” კაპიტანმა სეზონის ბოლოს გუნდიდან წასვლა უკვე დააანონსა, შაბათ საღამოს კი, საკლუბო ტელეარხთან საუბრისას, გადაწყვეტილების შესახებ ვრცლად ისაუბრა.

“ვფიქრობ, გადამწყვეტი მომენტი მაშინ დადგა, როდესაც ბრენდან როჯერსმა ცოტა ხნის წინ თავისთან დამისვა და მითხრა, რომ დადგა დრო ვიფიქროთ, როგორ გავაკონტროლოთ ჩემი თამაში და ჩემი სათამაშო დრო იმის მიხედვით, თუ რა იქნება კარგი ჩემთვის და რა – გუნდისთვის. გავაანალიზე და სწორი გადაწყვეტილებაა, მაგრამ როდესაც დიდი ხნის განმავლობაში სასტარტო შემადგენლობის ფეხბურთელი ხარ, ეს მაინც რთული იქნება ჩემთვის. მწვრთნელის წინადადება მივიღე. როცა მოედანზე ვიქნები ან როცა სათადარიგოთა სკამზე მომიწევს ყოფნა, ან სადაც გინდა ვიყო, მე ყველაფერს გავაკეთებ გუნდისთვის, თუმცა ამ საუბარმა წასვლა გადამაწყვეტინა. მაისში 35 წლის ვხდები. რვა წლიდან ფეხბურთში ვარ. ყოველთვის ვფიქრობდი, რომ ეს დღე დადგებოდა და მე ვფიქრობ, მალე დადგება კიდეც.

მე ადამიანი ვარ და არა რობოტი და არც 24 წლის ახალგაზრდა. ვისურვებდი ამ ასაკის ვიყო და 24 წლისა შევხვედროდი ბრენდანს. მაშინ ჩვენ გვექნებოდა საუბარი ბევრ მოსაგებ ტიტულზე. რეალობა კი ისაა, რომ როჯერსი კლუბში მაშინ მოვიდა, როდესაც 32 წლის ვიყავი.” – განაცხადა ჯერარდმა.

ლივერპულელთა თავკაცმა აღნიშნა, რომ ჯერარდისთვის მოლაპარაკების დროს მწვრთნელობა არ შეუთავაზებია, რადგან თავად ფეხბურთელი ისედაც ახდენს გავლენას მოთამაშეებზე და სტიმულს აძლევს.

“ლივერპულმა” ჯერარდს 2014 წლის ნოემბერში ახალი კონტრაქტი შესთავაზა, თუმცა ფეხბურთელმა ხელშეკრულების გახანგრძლივება იუარა. ამის მიზეზი კი როჯერსია, რომელიც ჯერარდს ხშირი თამაშის გარანტიას ვერ აძლევს. ჯერარდს მშობლიური კლუბის დატოვება ძალიან უჭირს, თუმცა უნდა, ახალი გამოწვევები მიიღოს. ერთ-ერთი წინადადება მას ამერიკიდან, “ლოს ანჯელეს გალაქსიდან” აქვს.