ჰოლანდიის ქალაქ გრონინგენში მიმდინარე საერთაშორისო ტურნირის დასრულებამდე 1 ტურიღა რჩება, ქართველ მოჭადრაკეებს კი საპრიზო სამეულში მოხვედრის შანსი აღარ აქვთ.

ქართველთაგან საუკეთესო შედეგი შოთა აზალაძეს (2499) გააჩნია, რომელიც შავი ფიგურებით იტალიელ დანიელე ვოკატუროს (2590) დაუზავდა და 5.5 ქულით მე-11 ადგილზეა.

4.5 ქულით 35-ე პოზიციაზე გადაინაცვლა დავით ლობჟანიძემ (2433), რომელიც შავებით თურქ დემრე კერიგანთან (2277) დამარცხდა, ხოლო ალექსანდრე ებრალიძე (2128) 3.5 ქულით 74-ეა. ეს უკანასკნელი თეთრებით ჰოლანდიელ ვიმ ჰეემსკერკს (2169) დაუზავდა.

დასკვნით ტურში აზალაძე და ლობჟანიძე თეთრი ფიგურებით ითამაშებენ. პირველი სომეხ ვაჰე ბაღდასარიანს (2368) გაეჯიბრება, მეორე კი – გერმანელ პეტერ ვაკერს (2305). ებრალიძე შავებით რუმინელ ვლად-იონუტ შტეგარიუს (2268) ეთამაშება.

გრონინგენის ტურნირის მოგების საუკეთესო შანსი გერმანიის სახელით მოთამაშე ალექსანდერ დონჩენკოს (2523) აქვს, რომლის აქტივშიც 7.0 ქულაა. იგი უახლოეს კონკურენტ ალექსანდერ იპატოვს (თურქეთი, 2599) 0.5 ქულით უსწრებს.