ოთხი დღეც და 2014 წელი წარსულს ჩაბარდება. წლეულს ბევრი გამორჩეული მატჩი გაიმართა, ამასთან, მსოფლიოს ჩემპიონატიც ჩატარდა.
გადავწყვიტეთ გაგვეხსენებინა რამდენიმე დასამახსოვრებელი შეხვედრა, რომლებიც 2014 წელს ჩატარებულ სხვა მატჩებთან შედარებით ისტორიას სამუდამოდ შემორჩება. მატჩები, რომლებიც ნამდვილად იქნება სალაპარაკო თემა წლების განმავლობაში.
ბრაზილია – გერმანია 1:7 (მსოფლიოს ჩემპიონატი, ნახევარფინალი) – იმ შეხვედრებს შორის, რომელიც 2014 წელს გაიმართა, უდაოდ ყველაზე დასამახსოვრებელი 8 ივლისს, ბელუ ორიზონტეში შედგა. მსოფლიოს ჩემპიონატის ნახევარფინალში ერთმანეთს მასპინძელი ბრაზილიისა და გერმანიის ეროვნული ნაკრებები შეხვდნენ. ის, რაც იმ დღეს მოხდა ალბათ, საუკუნეების განმავლობაში არ მიეცემა დავიწყებას. ევროპელებმა მსოფლიოს ხუთგზის ჩემპიონებს საფეხბურთო გაკვეთილი ჩაუტარეს და ისტორიაში ყველაზე სამარცხვინო მარცხი აგემეს. ტურნირის მომავალმა ტრიუმფატორებმა ბრაზილია საკუთარი გულშემატკივრის თვალწინ 7:1 გაანადგურა. შეხვედრის პერიპეტიების აღწერით თავს არ შეგაწყენთ, ისედაც ყველამ ყველაფერი საკუთარი თვალით ნახა.
“ატლეტიკო” – “რეალი” 1:4 დ.დ (ჩემპიონთა ლიგის ფინალი) – 24 მაისს, ლისაბონში “და ლუჟზე” ევროპის უძლიერესი კლუბის სახელი ორმა მადრიდულმა გუნდმა გაარკვია. “ატლეტიკოს” იმ დროისთვის უკვე დაეჩაგრა თანაქალაქელი კლუბი ესპანეთის პრიმერედივიზიონში და იმედოვნებდა, რომ ისტორიაში პირველად გახდებოდა ევროპის საუკეთესო გუნდი. დიეგო სიმეონეს გუნდს წარმატებამდე ორიოდე წუთი დააკლდა. დიეგო გოდინის გოლით პირველივე ტაიმში “როხიბლანკო” დაწინაურდა, “რეალმა” კი გათანაბრება მხოლოდ მსაჯის კომპენსირებულ დროში შეძლო. დამატებით ტაიმებში “ატლეტიკო” ფსიქოლოგიურად გატყდა და 30 წუთში 3 გოლი გაუშვა. იმ დღეს “რეალმა” 12 წლიანი პაუზის შემდეგ მე-10 ჩემპიონთა თასი შემატა თავის მდიდარ მუზეუმს.
ესპანეთი – ჰოლანდია 1:5 (მსოფლიოს ჩემპიონატი, ჯგუფური ეტაპი) – მსოფლიოს და ევროპის ჩემპიონი ესპანეთის ნაკრები ბრაზილიაში მთავარი ფავორიტის რანგში ჩავიდა. ჰოლანდიის ნაკრებისგან კი დიდ წარმატებას არავინ ელოდა, გუნდი გაახალგაზრდავების გზას ადგა. 13 ივნისს სალვადორში ჰოლანდიის ნაკრებმა საუკუნის ფეხბურთი აჩვენა. მიუხედავდ იმისა, რომ ანგარიში პირინეელებმა წაიყვანეს, რობინ ვან პერსის და არიენ რობენის მეთაურობით “ორანჯმა” მეტოქეს შემდგომ 5 უპასუხო გოლი გაუტანა და მთელ საფეხბურთო სამყაროს დაანახა, რომ ესპანეთის ნაკრები თავის თავს არ ჰგავდა. ამ შეხვედრაში ბევრი ლამაზი ეპიზოდიც იყო, რობინ ვან პერსის გატანილ დაუვიწყარ გოლზე და არიენ რობენის სოლო რეიდზე მომავალი თაობის აღზრდაც კი შეიძლება.
“ვალენსია” – “ბაზელი” 5:0 (ევროპის ლიგა, მეოთხედფინალი) – 2014 წლის 11 აპრილს, დაუვიწყარ მატჩს უმასპინძლა “მესტალიამ”. შვეიცარიულ “ბაზელს” მეოთხედფინალის პირველი შეხვედრა “სენტ იაკობს პარკზე” 3:0 ჰქონდა მოგებული და ნახევარფინალის საგზური დაბევებული ეგონა. ესპანურმა კლუბმა კი განმეორებით შეხვედრაში “ბაზელს” თამაში შემოუტრიალა და სამბურთიანი ჩამორჩენა ძირითად 90 წუთში გააბათილა. მეორე დამატებით დროში “ღამურებმა” კიდევ ორი გოლი გაიტანეს და ევროტურნირების საუკეთესო ოთხ გუნდში ზუსტად 10 წლის შემდეგ პირველად გავიდნენ.
“ბაიერნი” – “რეალი” 0:4 (ჩემპიონთა ლიგა, ნახევარფინალი) – 29 აპრილს მიუნხენში ადგილობრივ გუნდთან ჩემპიონთა ლიგის ნახევარფინალში სათამაშოდ მადრიდის “რეალი” ჩავიდა. გერმანულ გუნდს “სანტიაგო ბერნაბეუზე” 0:1 წაეგო და იმედოვნებდა, რომ ერთბურთიან ჩამორჩენას აღმოფხვრიდა და ფინალში თამაშის უფლებას ზედიზედ მეორედ ირგუნებდა. “ბაიერნის” იმედებს ცივი წყალი მატჩის დასაწყისშივე სერხიო რამოსმა გადაასხა, როცა მანუელ ნოიერს ორჯერ გაუტანა. რამოსის დარად, დუბლით გამოირჩა კრიშტიანუ რონალდუ, რომელმაც ანგარიშს გამანადგურებელი სახე მისცა. “ალიანს არენაზე” გამართული მატჩი ამ ორი დიადი გუნდის ისტორიაში სამუდამოდ დარჩება, როგორ ერთ-ერთი დაუვიწყარი და საოცარი შეხვედრა.
გერმანია – არგენტინა 1:0 დ.დ (მსოფლიოს ჩემპიონატი, ფინალი) – მსოფლიოს 2014 წლის ჩემპიონი 13 ივლისს გამოვლინდა. რიოში, “მარაკანაზე” პლანეტის უძლიერესი გუნდის ვინაობა გერმანიის და არგენტინის ნაკრებებმა გაარკვიეს. ეს გუნდები მუნდიალის აღნიშნულ ეტაპზე ერთმანეთს მესამედ დაუპირისპირდნენ. განმეორდა 24 წლის წინანდელი ისტორია და გამარჯვება ევროპელებს დარჩათ. ძირითად დროში გუნდებმა ერთმანეთის კარს გასაღები ვერ მოუძებნეს. არადა, “ალბიესელსეტეს” მხრიდან კარგი შანსი ჰქონდათ ლიონელ მესის და გონსალო იგუაინს. დამატებითი დროის დასრულებამდე 7 წუთი რჩებოდა, როდესაც შეცვლაზე შესულმა მარიო გიოტცემ “ბუნდესგუნდს” მეოთხე სამუნდიალო ტიტული მოუტანა.
“ბარსელონა” – “ატლეტიკო” 1:1 (ესპანეთის პრიმერადივიზიონი) – 2004 წლის შემდეგ, როდესაც ესპანეთის ჩემპიონი “ვალენსია” გახდა, “რეალისა” და “ბარსელონას” ჭიდილში ვერცერთი გუნდი ერეოდა. 10 წლიანი ტრადიცია კი წლეულს დიეგო სიმეონეს ძალიან სიმპათიურმა გუნდმა დაარღვია და ტიტულოვან მეტოქეებს დამსახურებულად აჯობა. “ლა ლიგის” ბოლო, 38-ე ტურში ერთმანეთს “კამპ ნოუზე” პირველ და მეორე ადგილებზე მყოფი გუნდები დაუპირისპირდნენ. მათ წინაშე მარტივი ამოცანა იდგა – “ბარსას” მოგება სჭირდებოდა, “ატლეტიკოს” არწაგება. მადრიდელებმა მატჩის დასაწყისშივე ორი ლიდერი, არდა თურანი და დიეგო კოშტა ტრავმების გამო მოისაკლისეს. ტაიმის ბოლოს კი ალექსის სანჩესის ზღაპრული სილამაზის გოლით “ბლაუგრანა” დაწინაურდა. თითქოს “ბარსა” ახლოს იყო არცთუ წარმატებულად ჩატარებულ სეზონი ტიტულით დაეგვრიგვინებინა, მაგრამ მეორე ნახევარში დიეგო გოდინის თავურმა დარტყმამ “როხიბლანკოს” ჩემპიონობა მოუტანა.
“იუვენტუსი” – “ნაპოლი” 2:2 დ.დ 5:6 პენ. (იტალიის სუპერთასი) – ახლახან, ყატარის დედაქალაქ დოჰაში ნამდვილი თრილერი გაითამაშეს ტურინის “იუვენტუსმა” და “ნაპოლიმ”. იტალიის სუპერთასის ეგიდით ჩატარებულ შეხვედრას არაფერი აკლდა, არც დრამატიზმი, არც ლამაზი გოლები, ლამაზი ეპიზოდები, არც დაძაბულობა. “იუვეს” შეხვედრა ორჯერ მიჰყავდა. როცა ტურინელებმა მეორე დამატებითი ტაიმის დასაწყისში მეორედ მოახერხეს დაწინაურება, ბევრმა იფიქრა, რომ ალეგრის გუნდი გაიმარჯვებდა, მაგრამ შეხვედრის დასრულებამდე ორი წუთით ადრე გონსალო იგუაინმა გაათანაბრა. დაინიშნა მატჩისშემდგომი პენალტების სერია, რომელშიც გუნდები თერთმეტმეტრიანის ნიშნულთან ცხრა-ცხრაჯერ მივიდნენ. გამოცდილმა ჯიჯი ბუფონმა სამ შემთხვევაში აჯობა მეტოქეებს და აქედან ორ შემთხვევაში დამატებით პენალტების სერიაში. “იუვეს” მატჩ-პოინტი ორჯერ ჰქონდა, მაგრამ ჯორჯო კიელინიმ და რობერტო პერეირამ შანსი ვერ გამოიყენეს. საბოლოოდ კი ყველაფერი უკუღმა დატრიალდა და სიმონე პადოინის მიერ გაცუდებული მეცხრე თერთმეტრიანით რაფაელ ბენიტესის “ნაპოლიმ” წელი ტიტულით დაასრულა.
“მანჩესტერ სიტი” – “ბაიერნი” 3:2 (ჩემპიონთა ლიგა, ჯგუფური ეტაპი) – ჩემპიონთა ლიგის E ჯგუფი სიკვდილის ჯგუფი გახლდათ. “ბაიერნი”, “სიტი” და “რომა” – ამათგან ერთ-ერთს თუ არა ორს, ლიგის ჯგუფში ჩარჩენა ელოდა. გერმანელებმა საკითხი მალევე გადაწყვიტეს და პირველი ადგილი გაინაღდეს. დარჩენილი ერთი საგზურისთვის კი სამ გუნდს შორის ფიცხელი ბრძოლა გაჩაღდა. მე-5 ტურში “სიტიმ” “ბაიერნს” უმასპინძლა და შანსის შესანარჩუნებლად მხოლოდ გამარჯვება სჭირდებოდა. “ქალაქელები” მატჩის დასაწყისში დაწინაურდნენ, თანაც “ბაიერნი” კაცნაკლული დარჩა. თუმცა მათ გერმანული ხასიათი კიდევ ერთხელ გამოავლინეს და წინ გასვლა პირველივე ტაიმში შეძლეს. დარჩენილ 45 წუთში მასპინძლები არათუ გამარჯვებას, ფრის გახერხებასაც ვერ ახერხებდნენ, მაგრამ მატჩის 85-ე და 90-ე წუთებზე სერხიო აგუერომ ორჯერ დალაშქრა “რეკორდმაისტერის” კარი და საკუთარ გუნდს პლეი-ოფში გასვლის შანსი შეუნარჩუნა, რაც შემდგომ “სიტიმ” შესანიშნავად გამოიყენა.
“კრისტალ პალასი” – “ლივერპული” 3:3 (ინგლისი, პრემიერლიგა) – მთელი გასული სეზონის განმავლობაში პრემიერლიგას “ლივერპული” ლიდერობდა და საოცნებო ჩემპიონის ტიტულთან, რომელიც “წითლებს” 1990 წლის მერე ვერ მოეგოთ, ძალზე ახლოს იყო. ჩემპიონატის დასრულებამდე ერთი ტურით ადრე, 37-ე ტურში “ლივერი” “კრისტალ პალასს” ეწვია და 55-ე წუთისთვის ანგარიში 3:0 წაიყვანა. დარჩენილ 35 წუთში არაფერი მოასწავებდა იმას, რომ შეხვედრის ბოლოს ლივერპულელები ოცნების ახდენას დაშორდებოდნენ. თუმცა საფეხბურთო განგებამ სტივენ ჯერარდს და მის თანაგუნდელებს ხურდა დაუბრუნა. დიახ ხურდა, 2005 წელს ჩემპიონთა ლიგის ფინალის გამო. სხვა შედარება შეუძლებელია მოიყვანო. მაშინ, ინგლისური გუნდი “მილანთან” ჩემპიონთა ლიგის ფინალს სამბურთიანი სხვაობით აგებდა, თუმცა თამაში შემოატრიალა და ჩემპიონთა ლიგა მოიგო. ახლა კი ყველაფერი პირიქით მოხდა. დაკარგული ორი ქულა გადამწყვეტი გამოდგა ინგლისის 2014 წლის ჩემპიონის გამოვლენაში. ოქროს მედლები “მანჩესტერ სიტის” ერგო.
“რომა” – “ბაიერნი” 1:7 (ჩემპიონთა ლიგა, ჯგუფური ეტაპი) – გერმანიის ნაკრების დარად, მიუნხენის “ბაიერნმაც” მოახერხა და გასვლით შეხვედრაში 7:1 გაიმარჯვა. 21 ოქტომბერს, “ბაიერნმა” რომში, “სტადიო ოლიმპიკოზე” იტალიური “რომა” მიწასთან გაასწორა. მიუნხენურმა გიგანტმა იტალიის ვიცე-ჩემპიონებს ნამდვილი საფეხბურთო გაკვეთილი ჩაუტარა. აღსანიშნავია, რომ “რომამ” ანალოგიური ანგარიშით ჩემპიონთა ლიგაზე პირველად არ წააგო. 2007 წელს, რომაელებს ანალოგიური იაღლიში “მანჩესტერ იუნაიტედთანაც” მოუვიდათ.
