ქართველმა სუმოისტმა ლევან გორგაძემ იგივე ტოჩინოშინმა გასულ ნოემბრის ბაშოზე 15-დან 11 შერკინება მოიგო და მებრძოლის სულის გამოვლინებისთვის დაწესებული სპეციალური პრიზი – კანტო-შოც დაიმსახურა, რაც განახლებულ რეიტინგში (ბანძუკე) მისი დაწინაურების საფუძველი გახდა.

იანვრის სუპერტურნირის წინ გამოქვეყნებულ ბანძუკეში ტოჩინოშინმა აღმოსავლეთის მე-8 მაეგაშირას წოდება დასავლეთის პირველი მაეგაშირას ტიტულზე გაცვალა, ამდენად სანიაკუმდე (პირობითი კატეგორია, რომელშიც 4 უმაღლესი წოდების – იოკოძუნა, ოძეკი, სეკივაკე, კომუსუბი – მქონე სუმოისტები არიან გაერთიანებულნი) სულ მცირეღა რჩება.

ქართველი გოლიათის წინ სულ რჩეული მებრძოლები იმყოფებიან. იოკოძუნას სტატუსს ინარჩუნებენ ჰაკუჰო, კაკურიუ და ჰარუმაფუჯი, ოძეკებად რჩებიან კისენოსატო, კოტოშოგიკუ და გიოეიდო, კვლავაც სეკივაკეები იქნებიან აოიამა და იჩინოჯო, ხოლო კომუსუბის რანგში დოჰიოზე ტაკაიასუ და ტოჩიოძანი გავლენ.

წინსვლა განიცადა რანგით მე-2 ძურიოს დივიზიონში მოასპარეზე თეიმურაზ ჯუღელმაც. გაგამარუმ გასულ ბაშოზე დადებითი ბალანსი (კაჩი-კოში) დასკვნით დღეს დაიბევა და დასავლეთის მე-5 ნომრის სტატუსი დასავლეთისვე მე-2 ნომრობაზე გაცვალა.

სავარაუდოა, რომ კიდევ ერთი წარმატებული ტურნირის შემთხვევაში, ჯუღელი ელიტარულ მაკუუჩი დივიზიონს დაუბრუნდება. აქვე ვთქვათ, რომ მომდევნო სუპერტურნირი – ჰაცუ ბაშო 11-25 იანვარს ტოკიოს “რიოგოკუ კოკუგიკანში” შედგება.