“მანჩესტერ იუნაიტედის” მთავარმა მწვრთნელმა ლუის ვან გაალმა სამშაბათს საღამოს გამართულ პრესკონფერენციაზე საზოგადოებას საჯაროდ შობა მიულოცა. ჰოლანდიელ სპეციალისტს უელსელი გარეთ ბეილის შესაძლო ტრანსფერის შესახებაც ჰკითხეს, რაზეც ვან გაალმა შემდეგნაირად უპასუხა: “არ შემიძლია ჟურნალისტებთან განვიხილო ეს საკითხი. ამ თემას აღმასრულებელ დირექტორთან განვიხილავ და არა რომელიმე მედიის წარმომადგენელთან”.

ესპანური მედიის ინფორმაციით, “წითელი ეშმაკები” მზად არიან მადრიდის “რეალს” გარეთ ბეილის სანაცვლოდ 120 მილიონი გირვანქა (153 მილიონი ევრო) გადაუხადონ. AS-ის ცნობით, უელსელი ფეხბურთელის გადაბირებით ლუის ვან გაალია დაინტერესებული.

ესპანურმა AS-მა “რეალის” გულშემატკივრებს შორის გამოკითხვა ჩაატარა, კითხვა კი შემდეგში მდგომარეობდა: “ისურვებდით თუ არა ბეილმა “სანტიაგო ბერნაბეუ” დატოვოს. გამოკითხულთა 54%-ს ბეილის ესპანეთიდან აბარგება სურს.

რატომ სურთ გულშემატკივრებს ბეილის გაყიდვა? მოდით გადავხედოთ უელსელის “რეალში” გატარებულ პერიოდს და მნიშვნელოვან ფაქტებს.

2013 წლის 1 სექტემბერი: “რეალმა” მსოფლიოს სარეკორდო რანსფერი განახორციელა და ლონდონის “ტოტენჰემს” ბეილის სანაცვლოდ 100 მილიონი ევრო გადაუხადა.

14 სექტემბერი: უელსელმა შემტევმა “რეალის” მაისურით სადებიუტო მატჩში, “ვილიარეალის” წინააღმდეგ ფრედ 2:2 დასრულებულ დაპირისპირებაში დუბლი შეასრულა.

30 ოქტომბერი: “რეალის” სასტარტო შემადგენლობაში პირველად მოხვდა - “სევილიას” წინააღმდეგ მოგებულ მატჩში (7:3) დუბლი გაიფორმა და ორი საგოლე გადაცემაც შეასრულა.

30 ნოემბერი: პირველი ჰეთრიკი “რეალის” რიგებში.

2014 წლის 16 აპრილი: ბეილმა სამეფო თასის ფინალში “ბარსელონას” წინააღმდეგ გამარჯვების მომტანი გოლი მიითვალა, 2013/14 წლების სეზონში კი - მე-20 გოლი.

24 მაისი: “ტოტენჰემის” ყოფილმა ფეხბურთელმა ჩემპიონთა ლიგის ფინალის დამატებით დროში “ატლეტიკოს” გოლი გაუტანა და “რეალს” სარეკორდო მე-10 ტიტულის მოპოვებაში დაეხმარა.

12 აგვისტო: ბეილის მესამე ტიტული “რეალის” შემადგენლობაში – ევროპის სუპერთასი. რონალდუმ “სევილიას” ორი გოლი გაუტანა, პირველ შემთხვევაში კი ბეილმა უპასა.

20 დეკემბერი: კიდევ ერთი ტიტული – მსოფლიოს საკლუბო ჩემპიონობა. ბეილს “სან ლორენცოს” წინააღმდეგ 51-ე წუთზე გოლი გააქვს. როგორც შემდგომში გაირკვა მან მატჩის საბოლოო ანგარიში 2:0 დააფიქსირა.

23 დეკემბერი: “რეალის” გულშემატკივრების 54%-ს გარეთ ბეილის მადრიდული გრანდიდან აბარგება სურს.