საქართველოს ვაჟ კალათბურთელთა 24-ე ეროვნული ჩემპიონატის პირველი წრის მეექვსე ტური ბათუმში ადგილობრივი “ბათუმისა” და “სოხუმის” მატჩით გაიხსნა. ფავორიტად მასპინძლები ითვლებოდნენ, რომლებსაც 3 ამერიკელი ლეგიონერი ჰყავთ, ხოლო “სოხუმი” მთლიანად ქართველი კალათბურთელებითაა დაკომპლექტებული.

პროგნოზების საპირისპიროდ, აღნიშნული მატჩი სტუმართა უპირატესობით დაიწყო, რომელთა შორის გამოცდილი ლაშა ფარღავა და გიორგი ფერიაშვილი აქტიურობდნენ. აღსანიშნავია, რომ ამ უკანასკნელმა პირველივე ტაიმში შეძლო ორმაგი დუბლის (10ქ, 10მ) გაკეთება. დიდ შესვენებაზე “სოხუმი” შვიდქულიანი უპირატესობით – 49:42 გავიდა. მართალია, სტუმრებმა შეძლეს პირველ ტაიმში უპირატესობის მოპოვება, მაგრამ მეორე ნახევარში ვერ შეძლეს მისი შენარჩუნება და საბოლოოდ 14 ქულის სხვაობით 84:98 დამარცხდნენ.

“ბათუმის” გამარჯვებაში ლომის წილი ამერიკელმა ლეგიონერმა, უკანახაზელმა ბობ ჯინ იანგმა შეიტანა. რომელმაც 39 ქულით, 8 მოხსნითა და 7 პასით, ორივე გუნდის შემადგენლობაში საუკეთესო შედეგი აჩვენა. მის მიერ დაგროვილი 39 ქულა კი საუკეთესოა მიმდინარე ჩემპიონატში. იანგმა დინამოელი ბესიკ ლეჟავას რეკორდი 2 ქულით გააუმჯობესა.

ორმაგი დუბლი გააკეთა იანგის თანამემამულე ქრისტოფერ ლეონ ფელჩერმა, რომელმაც 13 ქულა და 12 მოხსნა მიითვალა.

სტუმართა შორის ყველაზე მეტი 24 ქულა ლაშა ფარღავამ დააგროვა. მისი თანაგუნდელებიდან ორმაგი დუბლის ავტორები გახდნენ გიორგი ფერიაშვილი და გრიგოლ შვანგირაძე, რომლებმაც შესაბამისად 19 ქულა, 17 მოხსნა და 19 ქულა, 10 მოხსნა დააგროვეს.

“ბათუმი” - “სოხუმი” 98:84 (21:29, 21:20, 27:18, 29:17)

ბათუმი: იანგი (39), მიქელაძე (25), ქელოგი (8), ელიაძე (6), ფელჩერი (13), ფევაძე, ლევან რევაზაშვილი (6), ბოლქვაძე (1).

მთავარი მწვრთნელი: მიხეილ კობეშავიძე

სოხუმი: ჩიტაშვილი, ჩლაიძე (5), ფარღალავა (24), შვანგირაძე (19), ფერიაშვილი (16), კვეტენაძე (9), დიმიტრი დვალიშვილი (6), გიორგი რევაზაშვილი, ბააკაშვილი (5).

მთავარი მწვრთნელი: ვაჟა კვარაცხელია