ესპანეთის ეროვნული ნაკრების და ლონდონის "ჩელსიდან" "მილანში" ორი წლით განათხოვრებული ცენტრალური თავდამსხმელი ფერნანდო ტორესი შესაძლოა მშობლიური კლუბის მადრიდის "ატლეტიკოს" რიგებს შეუერთდეს.
ესპანელები მზად არიან ფეხბურთელი დაიბრუნონ, ოღონდ თავდამსხმელში ფულის გადახდა არ უნდათ. ბრიტანული მედია იუწყება, რომ კლუბს 404 მილიონი გირვანქა ვალი აქვს და ფორმაში არმყოფ ფეხბურთელში ინვესტიციის ჩადება არ სურთ.
რამდენიმე დღის წინ ჟოზე მოურინიომ ტორესს დასცინა და აღნიშნა, რომ ფეხბურთელს შეუძლია "მილანის" ორწლიანი იჯარისგან განთავისუფლდეს.
მიმდინარე სეზონში ესპანელმა თავდამსხმელმა "როსონერის" რიგებში 10 მატჩი ჩაატარა და ერთი გოლი გაიტანა. ტორესი მოედანზე საშუალოდ 59 წუთს ატარებს. იტალიაში ესპანელი ჯერჯერობით ვერ ხარობს და შესაძლოა მან კარიერა კვლავ მშობლიურ კლუბში გააგრძელოს.
