ქალთა შორის საქართველოს პირველი ჩოგანი სოფო შაფათავა ინდოეთში რჩება და ლაკნოუს 15-ათასიანი ტურნირის კვალად, ნავი მუმბაიში 25-ათასიან შეჯიბრზე მე-2 განთესვით ითამაშებს.

სოფოს პირველი მეტოქე კვალიფიკაციის ერთ-ერთი გამარჯვებული – სერბი ნინა სტოიანოვიჩი იქნება. კვალიფიკაციაში ძალები ოქსანა კალაშნიკოვამაც სცადა და მასპინძელ ამრიტა მუკჰერჯის 6:1, 6:3 მოუგო, თუმცა, შემდეგ, მე-2 რეიტინგის ქართველი ონდოელვე ნატაშა პალიასთან 4:6, 4:5 მარცხდებოდა, როდესაც თამაში ვეღარ გააგრელა.

წყვილებში შაფათავა და რუსი მარგარიტა ლაზარევა მე-2 ნომრად არიან განთესილნი და უკრაინელ ბოგოლის და რუს ლეიკინას ეთამაშებიან.

თურქეთში, ანკარას 50-ათასიანი ტურნირის ძირითად ბადეში გასვლას ცდილობდნენ ეკატერინე გორგოძე და სოფო ქვაცაბაია, თუმცა, მიზანს ვერ მიაღწიეს. მე-5 ნომრად განთესილმა გორგოძემ რუს ანასტასია რუდაკოვასთან 6:4, 3:6, 1:6 წააგო, ხოლო ქვაცაბაია ფავორიტად მიჩნეულ ლატვიელ იელენა ოსტაპენკოს ვერ გაუმკლავდა – 3:6, 0:6.

წყვილთა ტურნირში გორგოძე და სლოვენიელი ნასტია კოლარი მე-4 რეიტინგის მქონე ბელარუსულ-რუსულ დუეტს (მაროზავა-მელნიკოვა) ეთამაშებიან, ქვაცაბაია და თურქი კოკჩე კი თურქ ერაიდინს და უზბეკ შარიპოვას გაეჯიბრებიან.

თურქეთშივე, ოღონდ ანტალიის 10-ათასიან ტურნირში იასპარეზებს გიორგი ცივაძე, ვაჟთა შორის საქართველოს პირველი ჩოგანი ნიკოლოზ ბასილაშვილი კი დოჰაში რჩება და მიჯრით მე-2 10-ათასიანი პირველობის მოგებას ეცდება.

ბასილაშვილი კვლავ პირველ ნომრადაა განთესილი და პირველ რაუნდში იტალიელ ჯორჯიო პორტალურის ეთამაშება.

დასასრულ, განახლებულ რეიტინგებსაც გავეცნოთ.

ქალთა კლასიფიკაცია: 248 (248). სოფო შაფათავა – 187 ქულა; 328 (330). ეკატერინე გორგოძე – 110; 440 (443). სოფო ქვაცაბაია – 68; 471 (439). ოქსანა კალაშნიკოვა – 59; 698 (704). მარიამ ბოლქვაძე – 24; 887 (737). მაკა ჩახნაშვილი-რანცინგერი – 13; 1123 (1129). თამარ კუტუბიძე – 5; 1213 (1213). თამარ ჭალაგანიძე – 3;

ვაჟთა კლასიფიკაცია: 191 (192). ნიკოლოზ ბასილაშვილი – 261 ქულა; 540 (540). ალექსანდრე მეტრეველი – 59; 863 (861). გიორგი ცივაძე – 18; 1118 (1118). გიორგი ჯავახიშვილი – 8; 1418 (1417). ალექსანდრე ბაკში – 3; 1720 (1715). ირაკლი მეტრეველი – 1;