ხვალ, ქართული კალათბურთის გულშემატკივრებისთვის მნიშვნელოვანი დღეა. პარიზულ დისნეილენდში 2015 წლის ევროპის ჩემპიონატის წილისყრა შედგება და შევიტყობთ, მომავალ ტურნირზე საქართველოს ნაკრები რომელ ქვეყანაში ითამაშებს და მეტოქეებად ვინ ეყოლება.
როგორც უკვე ვიუწყებოდით, ევროპირველობის 80-წლიანი არსებობის ისტორიაში, საწყისი ეტაპის მატჩებს ერთბაშად 4 ქვეყანა მიიღებს: გერმანია (ბერლინი), საფრანგეთი (მონპელიე), ლატვია (რიგა) და ხორვატია (ზაგრები), ხოლო პლეი-ოფისთვის გუნდები სრულად ფრანგულ ლილში გადაინაცვლებენ.
24 ფინალისტს შორის საქართველოს ეროვნული გუნდიცაა, ფორმატის მიხედვით კი, 5-20 სექტემბერს დაგეგმილ ევრობასკეტ-2015-ზე მხოლოდ ერთი ჯგუფური ეტაპი შედგება, რომელზეც ნაკრებები ოთხ ექვსგუნდიან პულში გადანაწილდებიან. საწყისი რაუნდის შედეგებით, პლეი-ოფში ჯგუფების საუკეთესო ოთხეულები გავლენ და ეს 16 გუნდი ბრძოლას მერვედფინალიდან გააგრძელებს.
ფიბა-ევროპის მმართველმა საბჭომ ევრობასკეტ 2015-ის ჯგუფური ეტაპის მასპინძელ ქვეყნებს პარტნიორი ფედერაციები ადრევე დაუმტკიცა. საფრანგეთმა პარტნიორად ფინეთი აირჩია, გერმანიამ – თურქეთი, ხორვატიამ – სლოვენია, ხოლო ლატვიამ – ესტონეთი. ამდენად, ჯგუფებში ორ-ორი მეტოქის ვინაობა უკვე ცნობილია, ხოლო დანარჩენი ადგილები როგორ შეივსება, დღეს შევიტყობთ.
წილისყრის პროცედურა ცენტრალური ევროპის დროით 16:30 საათზე (თბილისის დროით 19:30) დაიწყება და მასში მონაწილეობას ცნობილი კალათბურთელები დეიან ბოდიროგა, პატრიკ ფემერლინგი, გუნტა ბასკო-მელნბარდე, ანტუან რიგოდო, გორდან გირიჩეკი და რაშო ნესტეროვიჩი მიიღებენ.
წილისყრისთვის ლაივ-რეჟიმში თვალის მიდევნება ფიბა-ს ყოუტუბე-ის ოფიციალურ არხსა (www.youtube.com/FIBA) და ფიბა-ევროპას ოფიციალურ ვებ-გვერდზე (www.fibaeurope.com) იქნება შესაძლებელი. აქვე მომავალი ცერემონიის წინ ნაკრებთა განთესვის პრინციპს და წინასწარი კალათების შემადგენლობასაც შეგახსენებთ.
| N | ქვეყანა | ფიბა-ევროპას ბოლო ტურნირი | ადგილი | შედეგი | % | შეფარდება |
| 1 | საფრანგეთი | EB 2013 | 1 | |||
| 2 | ლიტვა | EB 2013 | 2 | |||
| 3 | ესპანეთი | EB 2013 | 3 | |||
| 4 | ხორვატია | EB 2013 | 4 | |||
| 5 | სლოვენია | EB 2013 | 5 | |||
| 6 | უკრაინა | EB 2013 | 6 | |||
| 7 | სერბეთი | EB 2013 | 7 | |||
| 8 | ფინეთი | EB 2013 | 9 | |||
| 9 | საბერძნეთი | EB 2013 | 11 | |||
| 10 | თურქეთი | EB 2013 | 17 | |||
| 11 | ლატვია | EB 2015 2nd QR | 1 | 6-0 | 100 | 1.2398 |
| 12 | ბოსნია-ჰერცეგოვინა | EB 2015 2nd QR | 2 | 4-0 | 100 | 1.1386 |
| 13 | პოლონეთი | EB 2015 2nd QR | 3 | 5-1 | 83.3 | 1.2385 |
| 14 | ბელგია | EB 2015 2nd QR | 4 | 5-1 | 83.3 | 1.1979 |
| 15 | მაკედონია | EB 2015 2nd QR | 5 | 5-1 | 83.3 | 1.1450 |
| 16 | იტალია | EB 2015 2nd QR | 6 | 3-1 | 75 | 1.1654 |
| 17 | გერმანია | EB 2015 2nd QR | 7 | 4-2 | 66.7 | 1.3243 |
| 18 | ისრაელი | EB 2015 2nd QR | 8 | 4-2 | 66.7 | 1.1195 |
| 19 | ჩეხეთი | EB 2015 2nd QR | 9 | 4-2 | 66.7 | 1.1150 |
| 20 | საქართველო | EB 2015 2nd QR | 10 | 4-2 | 66.7 | 1.0558 |
| 21 | ჰოლანდია | EB 2015 2nd QR | 11 | 4-2 | 66.7 | 1.0107 |
| 22 | რუსეთი | EB 2015 2nd QR | 12 | 2-2 | 50 | 1.1679 |
| 23 | ისლანდია | EB 2015 2nd QR | 13 | 2-2 | 50 | 0.9896 |
| 24 | ესტონეთი | EB 2015 1st QR | 1 | 5-3 | 62.5 | 1.1286 |
1-ლი კალათა: საფრანგეთი, ლიტვა, ესპანეთი, ხორვატია.
მე-2 კალათა: სლოვენია, უკრაინა, სერბეთი, ფინეთი.
მე-3 კალათა: საბერძნეთი, თურქეთი, ლატვია, ბოსნია-ჰერცეგოვინა.
მე-4 კალათა: პოლონეთი, ბელგია, მაკედონია, იტალია.
მე-5 კალათა: გერმანია, ისრაელი, ჩეხეთი, საქართველო.
მე-6 კალათა: ჰოლანდია, რუსეთი, ისლანდია, ესტონეთი.
წილისყრის პროცედურის ვიდეო-ნიმუში
">http://youtu.be/q251jzDW8r0]
