საქართველოს 19 წლამდე ფეხბურთელთა ნაკრები, რომელსაც გიორგი დევდარიანი წვრთნის, ევროპის 2015 წლის ჩემპიონატის ელიტ რაუნდში პირველ ჯგუფში მოხვდა, სადაც მეტოქეებად ესპანეთი, პორტუგალია და თურქეთი ერგო. ჯგუფის მასპინძლის ვინაობა მოგვაინებით გაირკვევა.

კენჭისყრა 3 დეკემბერს შვეიცარიის ქალაქ ნიონში უეფას შტაბ-ბინაში გაიმართა. ელიტ რაუნდის 7 ჯგუფის 7 გამარჯვებული ფინალურ ეტაპზე გავა, სადაც მათ მასპინძელი საბერძნეთი დაემატება.

ფინალური ეტაპი 2015 წლის 6-15 ივლისს საბერძნეთში ჩატარდება.