ქობულეთელებთან პაექრობაში ტორპედოელებს რამდენიმე ფეხბურთელი ისევ აკლდათ ტრამვის გამო, თუმცა, წამყვანი ფეხბურთელების არყოფნის პრობლემა ზღვისპირელებსაც ჰქონდათ. სატურნირო მდგომარეობიდან გამომდინარე მოტივაცია ორივე გუნდს დიდი ჰქონდა. ერთმანეთის მეზობლად მყოფი გუნდების დუელში გამარჯვებული მნიშვნელოვნად იუმჯობესებდა მდგომარეობას.

აჭარულ და იმერულ კლუბებს მოღრუბლულ ამინდში მოუწიათ თამაში, ბოლოს კი გაწვიმდა კიდეც, თუმცა ამინდს ფეხბურთელებისთვის ხელი ნამდვილად არ შეუშლია.

მატჩი მასპინძელთა უპირატესობით დაიწყო და ქობულეთელებს დებიუტშივე შეეძლოთ მინიმუმ ორჯერ ეხეირათ. ორივე შემთხვევაში გოლის ავტორობა ჩაფიძეს მართებდა – მას ხელსაყრელი პოზიციები ჰქონდა, მაგრამ ლაშამ ორივე შემთხვევაში შანსი ვერ გამოიყენა. ცოტა ხანში მეტრეველმა დაარტყა საჯარიმოს მისადგომებიდან ძლიერად, მაგრამ ქუთაისელთა კარის დარაჯმა საბა ცაბუტაშვილმა ბურთის დამორჩილება მოახერხა. აღსანიშნავია, რომ საბას უმაღლეს ლიგაში დებიუტი ჰქონდა და წაგების მიუხედავად, მას ურიგო შთაბეჭდილება არ დაუტოვებია.

მე-11 წუთზე უკვე რიონისპირელებმაც სეძლეს მოწინააღმდეგის კიპერის შეწუხება, როდესაც გოგი ფიფიამ დაახლოებით 23 მეტრიდან ძლიერად დაარტყა, მაგრამ კაკალაძემ ნახტომში შეძლო ბურთის კუთხურზე მოგერიება. რამდენიმე წუთში მასპინძელთა მეკარემ ისევ გამოიჩინა თავი, როდესაც ოთარ კვერნაძეს მახვილი კუთხიდან დარტყმული აუღო. მე-17 წუთზე კი თოდუას ჩაწოდების შემდეგ კვერნაძის თავური მცირედით არაზუსტი გამოდგა. სტუმართა მსგავსად თავურით დაემუქრა მოწინააღმდეგის კარს ზვიად მეტრეველი, მაგრამ მისი მცდელობა ცაბუტაშვილმა მშვიდი თამაშით გააუვნებელჰყო. ცოტა ხანში იმერთა ახალგაზრდა მეკარემ ჩაფიძეს აუღო საჯარიმო დარტყმა, 24-ე წუთზე კი ცაბუტაშვილმა გატანის საშუალება ზაზა ტუღუშს არ მისცა.

პირველი ტაიმის განმავლობაში ქობულეთელთა უპირატესობა აშკარა გახლდათ, მაგრამ რეალური საგოლე მომენტი ზღვისპირელებმა საწყისს 45 წუთში მხოლოდ ერთხელ შექმნეს, როდესაც 38-ე წუთზე ლაშა ჩაფიძის დარტყმული ძელს მოხვდა. ამ შემთხვევაში ქუთათურებს აშკარად გაუმართლათ, ტაიმი კი უგოლოდ დასრულდა.

მეორე ნახევარში პირველი სახიფათო მომენტი სტუმრებმა შექმნეს, როდესაც სევასტი თოდუას ჩაწოდების შემდეგ ხელსაყრელ პოზიციაზე მამასახლისი აღმოჩნდა, მაგრამ ახალგაზრდა ნახევარმცველმა ბურთის ხეირიანად შეჩერება ვერ შეძლო და ქობულეთელმა მცველებმა სიტუაცია იოლად განმუხტეს. სამაგიეროდ, ქობულეთელთა პირველივე შეტევა თამაშის განახლების შემდეგ შედეგიანი გამოდგა. გოლი სტანდარტულის გათამაშების შემდეგ გავიდა, როდესაც მესხის ჩაწოდებული რამდენიმე ტორპედოელს გადაცდა და ხოჭოლავას მიუვიდა, მან კი შეუჩერებლივ გადაგზავნა ბურთი კარში – 1:0.

ჩამორჩენამ ქუთათურები გააქტიურა, თუმცა ვერ ვიტყვით, რომ მათ განსაკუთრებული ხიფათი შექმნეს მოწინააღმდეგის კართან. ყველაზე დასამახსოვრებელი მაინც მამასახლისის შორეული დარტყმა გახლდათ, რომელიც არაზუსტი გამოდგა. 65-ე კი იმერული კლუბის ფეხბურთელებმა ანგარიში გაათანაბრეს. გუნდის კაპიტნის თენგიზ ჩიკვილაძის ჩაწოდების შემდეგ თავით ყველას ტანმორჩილმა ფიფიამ დაასწრო. მის ეფექტურად დარტყმულ თავურს კაკალაძემ ვერაფერი მოუხერხა და ანგარიში გათანაბრდა - 1:1.

ამის შემდეგ დაახლოებით 15 წუთის განმავლობაში თანაბარი ტამაში მიმდინარეობდა. მატჩის ეპილოგში კი მასპინძლები გააქტიურდნენ და ამან მათ გამარჯვებაც მოუტანა. მანამდე კი იყო მე-80 წუთზე მეტრეველის თავური დარტყმა, როდესაც “შუქურას” ფორვარდს ხელს არავინ უშლიდა, მაგრამ მისი მცდელობა ცაბუტაშვილმა გაანეიტრალა. 82-ე წუთზე კი ქუთაისელი მცველების შეცდომის წყალობით ცაბუტაშვილთან პირისპირ ზაზა ტუღუში დარჩა, თავისი შანსი შეირგო და “შუქურა“ საბოლოოდ დააწინაურა შეხვედრაში - 2:1.

დარჩენილ დროში “ტორპედოს” თავკაცმა შეტევის გასაძლიერებლად თოდუას ნაცვლად ნიკო კვასხვაძე გამოიყვანა, მაგრამ მცირე დროში ვერც მან შეძლო რაიმე დასამახოვრებელის შექმნა მოედანზე. არბიტრის საფინალო სასტვენმა კი ქობულეთის “შუქურას” გამარჯვება დააფიქსირა.

“შუქურა” - “ტორპედო” 2:1 (0:0)

30 ნოემბერი. 14:00. ქობულეთი. “ჩელე არენა”. 700 მაყურებელი

“შუქურა”: კაკალაძე, გიორგი გურული, ხოჭოლავა, ჩალაძე, ტვილდიანი, კუხიანიძე, ლობე, ზაზა ტუღუში, მესხი (კოპალიანი, 62), ჩაფიძე (ტაკიძე, 87), მეტრეველი (ბერუაშვილი, 88).

მთავარი მწვრთნელი: ამირან გოგიტიძე

“ტორპედო”: ცაბუტაშვილი, გელაშვილი (გოგიჩაიშვილი, 56), ჩაკვეტაძე, აბრამიძე, ფიფია, ბონდარენკო, თოდუა (კვასხვაძე, 84), მამასახლისი, კვერნაძე, ჩიკვილაძე, ბაბუნაშვილი.

მთავარი მწვრთნელი: რევაზ ძოძუაშვილი

გოლი: 1:0 ხოჭოლავა (52), 1:1 ფიფია (65), 2:1 ტუღუში (820)

გაფრთხილება: ბაბუნაშვილი (7), ბონდარენკო (74).

არბიტრი: ხვიჩა გაგნიძე (გორი)

მეგოლეები:

10 - ჯაბა დვალი (ზესტაფონი)

7 - ირაკლი მოდებაძე (დილა), ოთარ კვერნაძე (ტორპედო), გიორგი პაპუნაშვილი (დინამო თბილისი)

5 - შოთა ლომია (ზუგდიდი), ნიკოლოზ საბანაძე (დინამო თბილისი), დაჩი ცნობილაძე (მეტალურგი), კობა შალამბერიძე (გურია)

შენიშვნა: უმაღლეს, პირველ და დუბლების ჩემპიონატში თანაბარი ქულების დაგროვების შემთხვევაში, ადგილები გაირკვევა შემდეგი პრიორიტეტული პრინციპით:

- ჩემპიონატში უშუალოდ ურთიერთშეხვედრების შედეგები (ქულათა რაოდენობა და შემდეგ ბურთების უკეთესი სხვაობა. ბურთების ერთნაირი სხვაობის შემთხვევაში, უპირატესობა მიენიჭება გუნდს, რომელსაც ერთმანეთთან შეხვედრებში სტუმრად მეტი გოლი აქვს გატანილი);

- ჩემპიონატში მოგებათა მეტი რაოდენობა;

- ჩემპიონატში გატანილი და მიღებული ბურთების უკეთესი სხვაობა;

- ჩემპიონატში გატანილი გოლების მეტი რაოდენობა;

- ჩემპიონატში სტუმრად გატანილი გოლების მეტი რაოდენობა;

- ჩემპიონატის განმავლობაში გუნდის მიერ მიღებული – წითელ – ყვითელი ბარათების რაოდენობა (წითელი – 3 ქულა, ყვითელი – 1 ქულა. თანაბარი ქულების დაგროვების შემთხვევაში, უპირატესობა მიენიჭება ნაკლებ წითელ ბარათს);

- თუ გუნდებს ეს მაჩვენებელიც თანაბარი აღმოაჩნდებათ, ადგილების გამოსავლენად მოეწყობა კენჭისყრა.

გიორგი წურწუმია