ყაზანის “უნიკსმა” მწვრთნელის შეცვლის შემდეგ ევროლიგაში პირველი გამარჯვება იზეიმა, ვიქტორ სანიკიძისთვის კი გასული მატჩი წარუმატებელი გამოდგა.

ბერძენი დიმიტრის იტუდისის რუსმა შემცველმა ევგენი პაშუტინმა ქართველი კალათბურთელი მხოლოდ 04:38 წუთი დატვირთა და მე-2 ტაიმში მოედანზე არც გაუყვანია.

სანიკიძემ თითო ორქულიანი და სამქულიანი გააცუდა, ბურთი ერთხელ დაკარგა და 2-ჯერ დაჯარიმდა, აქტივში კი 2 მოხსნა ჰქონდა.

თურქულ “ეფესთან” მატჩში რუსული კლუბი 15 ქულითაც კი აგებდა, თუმცა, თამაშის “შემოტრიალება” მოახერხა და 67:64 იმარჯვა.

მასპინძელთა რიგებში 19 ქულით საუკეთესო კეიტ ლენგფორდი იყო, “უნიკსმა” კი A ჯგუფში მე-2 გამარჯვება იზეიმა და ჯერჯერობით, მე-5 ადგილზე იმყოფება.

ასევე 15 ქულით აგებდა ლიტვაში ჩასული თორნიკე შენგელიას “ლაბორალ კუჩაც”. “უნიკსის” დარად, ჩამორჩენა ბასკებმაც აღმოფხვრეს და ბოლო წუთზე წინაც იყვნენ, მაგრამ საბოლოოდ 79:80 წააგეს.

შენგელიამ მხოლოდ 13:10 წუთს ითამაშა და დასკვნით მეოთხედში მოედანზე არ გამოჩენილა, მისი მონაგარი კი 4 ქულა და 1 მოხსნა იყო. თორნიკემ 6-დან 2 ორქულიანი ჩააგდო დ 2 პერსონალური ფოლი მიიღო.

სტუმართა რიგებში შეუჩერებელი იყო ფრანგი ტომას უერტელი, რომელმაც 10-დან 8 სამქულიანი ჩააგდო და თავი 31 ქულას მოუყარა, სხვებმა კი აშკარად ვერ ივარგეს.

მაგალითად. ლატვიელმა დავის ბერტანსმა 10-დან 9 სამქულიანი ააცილა, სლოვენიელმა საშა ვუიაჩიჩმა თამაშიდან 9-დან 8 ტყორცნა გააცუდა, ხოლო ამერიკელმა კოლტონ აივერსონმა 9-დან 7 საჯარიმო გაუშვა მიზანს მიღმა.

“ლაბორალ კუჩამ” ევროლიგაში ზედიზედ მესამედ წააგო, 2 გამარჯვება შერჩა და D ჯგუფში ბოლოსწინა ადგილზე იმყოფება, ამდენად, შემდეგ ეტაპზე გასვლა ძალიან გაუჭირდება.

ტურნირში მოთამაშე ქართველთა კლუბებიდან ყველაზე იოლი დღე მანუჩარ მარკოიშვილის ცსკა-ს ჰქონდა, რომელმაც ბერლინის “ალბა” 95:66 გაანადგურა. მოსკოველებს B ჯგუფში 6-ვე მატჩი მოიგეს და მომდევნო რაუნდში თამაში უკვე განაღდებული აქვთ.

შეგახსენებთ, რომ მარკოიშვილს ჯერაც ტრავმა აწუხებს და მონაწილეობა არც გასულ მატჩში მიუღია, საუკეთესო კი ცსკა-ს ფრანგი ლეგიონერი ნანდო დე კოლო იყო, რომელმაც 22 ქულა მოაგროვა.

ისიც ვთქვათ, რომ მე-6 ტურის მატჩს ხვალ ჩაატარებს ლევან ფაცაციას “ნიჟნი ნოვგოროდი”. რუსული კლუბი, რომელსაც ლატვიელი მწვრთნელი აინარს ბაგატსკისი ავარჯიშებს, იტალიაში “დინამო სასარის” ესტუმრება.