ქართველმა სუმოისტმა ლევან გორგაძემ ნოემბრის სუპერტურნისი მე-10 დღეს მე-8 გამარჯვება მოიპოვა და დადებითი ბალანსი ანუ კაჩი-კოში გაინაღდა, რაც მისი წოდებაში დაწინაურების წინაპირობაა.

შეგახსენებთ, რომ ტოჩინოშინი კიუშიუ ბაშოს აღმოსავლეთის მე-8 მაეგაშირას ტიტულით შეხვდა და თეორიულად, “იმპერატორის თასის” მოპოვების შანსსაც ინარჩუნებს, რადგანაც იოკოძუნებს – კაკურიუს და ჰაკუჰოს, შესაბამისად, 2 და 1 მოგებით ჩამორჩება, წინ კი, კიდევ 5 ორთაბრძოლაა.

ტოჩინოშინის მორიგი მსხვერპლი დასავლეთის მე-16 მაეგაშირა ჩიიომარუ გახდა, რომელიც ქართველმა გოლიათმა ოშიდაშით დაჯაბნა. ოთხშაბათს ლევანს სერიოზული შერკინება ელის, რადაგანაც მეტოქედ ასევე 8 ბრძოლის მომგები და შესაბამისად, კარგ ფორმაში მყოფი – დასავლეთის მე-11 მაეგაშირა კიოკუტენჰო ეყოლება.

ცენტრალური ოძეკი კისენოსატოს (8-2) და კაკურიუს დაპირისპირება იქნება, ჰაკუჰო ოძეკი გოეიდოს (4-6) გაეჯიბრება, ხოლო ჰარუმაფუჯი (8-2) – სეკივაკე აოიამას (5-5).

რანგით მე-2 ძურიოს დივიზიონში მთავარი ბრძოლები წინ ელის გაგამარუს შიკონათი ცნობილ თეიმურაზ ჯუღელს, რომელიც დასავლეთის მე-5 ნომრის წოდებით ირჯება.

გაგამარუმ დასავლეთის მე-12 ნომერი საკიგაკე ოშიდაშით დაჯაბნა და ისევ თანაბარ ბალანსზე (5 მოგება, 5 მარცხი) გავიდა. ქართველი სეკიტორის შემდეგი მეტოქე აღმოსავლეთის მე-13 ნომერი ტენკაიჰო იქნება.

წოდებაში დასაწინაურებლად, დარჩენილი 5 შერკინებიდან ჯუღელს მინიმუმ სამის მოგება სჭირდება.

კიუშიუ ბაშოს მე-10 დღის მიმოხილვა

ტოჩინოშინის ბრძოლა 3:52-დან