ესპანეთის ეროვნული ნაკრების მთავარმა მწვრთნელმა ვისენტე დელ ბოსკემ განაცხადა, რომ ლონდონის "ჩელსის" ფეხბურთელების დიეგო კოშტას და სესკ ფაბრეგასის მიმართ არანაირი შურისძიება არ იქნება და იგი ფეხბურთელებს არ აშინებს.
ევროშესარჩევში ბელარუსთან მოგებული მატჩის შემდეგ (3:0), ესპანელმა სპეციალისტმა აღნიშნა, რომ "არისტოკრატთა" ფეხბურთელებს ნაკრებში თამაში გარანტირებული არ აქვთ.
"ეს იმიტომ ვთქვი, რომ როდესაც ფაბრეგასი და კოშტა დაგვიბრუნდებიან და კარგ ფორმაში იქნებიან, სხვა ფეხბურთელებისთვის, რომლებიც ასევე კარგად იასპარეზებენ რთული იქნება ისინი ჩაანაცვლო. "ჩელსის" ფეხბურთელებს არ ვაშინებ და მათ მიმართ არანაირი შურისძიება არ მამოძრავებს, ჩვენ ფეხბურთი ძალიან კარგად ვიცით. თუ შენ არ ითამაშებ და შენი შემცვლელი კარგად გაირჯება, შესაბამისად გჭირდება უფრო კარგად ითამაშო, რათა ნაკრებში მოხვდე", - განაცხადა ესპანელმა სპეციალისტმა.
დიეგო კოშტა და სესკ ფაბრეგასი ეროვნულ ნაკრებში ტრავმის გამო ვერ მოხვდნენ. თუმცა "ფურია როხას" თამაშამდე რამდენიმე დღით ადრე ორივე ფეხბურთელმა პრემიერლიგაში "ლივერპულის" წინააღმდეგ მოგებულ მატჩში (2:1) მონაწილეობა სრულად მიიღეს და კოშტამ გამარჯვების მომტანი გოლიც კი გაიტანა. აქვე ცნობილია, რომ ფეხბურთელების ნაკრებში დატვირთვის მოწინააღმდეგე ჟოზე მოურინიოც გახლავთ. პორტუგალიელის აზრით, ფეხბურთელები სანაკრებო პაუზის შემდეგ გუნდს ტრავმირებულები უბრუნდებიან და კლუბი წარმატებულად ვეღარ ასპარეზობს.
