მადრიდის "რეალის" მთავარმა მწვრთნელმა კარლო ანჩელოტიმ ჩემპიონთა ლიგის ჯგუფური ეტაპის მეოთხე ტურის მოახლოებულ მატჩამდე "ლივერპულის" წინააღმდეგ განაცხადა, რომ მიუხედავად ლაზარეთში მყოფი ტრავმირებული ფეხბურთელების დანაკლისისა, მისი გუნდი წარმატების მისაღწევად ყველაფერს გააკეთებს.
"კარგად ვთამაშობთ და ვიცით რამდენად მნიშვნელოვანი მატჩი გველოდება. ყოველი მატჩი გვიჩვენებს ვვითარდებით თუ უკან მივდივართ. ჩვენ მეტოქის არ გვეშინია, რადგან პროფესიონალი გუნდი მყავს. ფაბიო კოენტრაო, ხესე, კარვახალი, ილიარამენდი და ხედირა "მერსისაიდელების" წინააღმდეგ მონაწილეობას ვერ მიიღებენ. ბეილი თავს კარგად გრძნობს და მატჩის წინ გადავწყვეტ ითამაშებს თუ არა", - განაცხადა იტალიელმა სპეციალისტმა და იქვე რონალდუს შესახებაც გააკეთა კომენტარი. - "კრიშტიანუ გუნდური სტილის მოთამაშეა. იგი ყოველ მატჩზეა ფოკუსირებული და არა რეკორდების გაუმჯობესებაზე. რთული მოძებნო პორტუგალიელის აღსაწერად სიტყვები - იგი ფანტასტიკურია."
მადრიდული და ლივერპულური გრანდების დაპირისპირება დღეს "სანტიაგო ბერნაბეუზე" თბილისის დროით 23:45 საათზე დაიწყება.
