51 წლის შოტლანდიელმა სპეციალისტმა დავიდ მოიესმა შესაძლოა სან-სებასტიანის "რეალ სოსიედადი" ჩაიბაროს. აღნიშნულ ინფორმაციას ბრიტანული guardian-ი ავრცელებს.
ესპანელებმა პრიმერადივიზიონის 2014/15 წლების სტარტზე წარუმატებელი თამაშის გამო მთავარი მწვრთნელის პოსტიდან იაგო არასატე დაითხოვეს. "სოსიედადის" ხელმძღვანელობამ არასატეს თანაშეემწეებთანაც გაწყვიტა კონტრაქტი, შესაბამისად კლუბმა ახალი სამწვრთნელო შტაბი მალევე უნდა დააკომპლექტოს.
დავიდ მოიესი "მანჩესტერ იუნაიტედიდან" განთავისუფლების შემდეგ, რახანია უკლუბოდაა. ბოლო დროს შოტლანდიელს მილანის "ინტერსაც" უკავშირებენ. ესპანური კლუბის თავკაცთა კანდიდატებს შორის "პრესტონის", "ევერტონის" და მანჩესტერული გრანდის ყოფილი დამრიგებლის გარდა, "ვესტ ბრომვიჩის" და არგენტინის ეროვნული ნაკრების ყოფილი მწვრთნელები პეპე მელი და ალეხანდრო საბელია არიან.
