ქართველ სუმოისტ ლევან გორგაძეს ბოლოდროინდელი ჩინებული გარჯა დაუფასდა. ტოჩინოშინის შიკონათი ცნობილმა გორგაძემ მძიმე ტრავმის გადატანის შემდეგ, მიჯრით ოთხ ბაშოზე იმარჯვა (2-ჯერ რანგით მე-3 მაკუშიტას დივიზიონში, 2-ჯერ კი – მე-2 ძურიოში) და ელიტარულ მაკუუჩი დივიზიონს დაუბრუნდა.

მეტიც, 27 წლის ქართველი სუმოისტი მყის აღმოსავლეთის მე-8 მაეგაშირა გახდა, ამგვარად, თუკი წარმატებული ასპარეზობა გააგრძელა, მალე სანიაკუსაც (პირობითი კატეგორია, რომელშიც 4 უმაღლესი წოდების – იოკოძუნა, ოძეკი, სეკივაკე, კომუსუბი – მქონე სუმოისტები არიან გაერთიანებულნი) მიუახლოვდება.

განახლებულ ბანძუკეში (რეიტინგი) მაკუუჩიში ვერ ვიხილავთ ქართველ გოლიათ თეიმურაზ ჯუღელს. გაგამარუს ძურიოს მე-5 ნომრის წოდება მიენიჭა და მომავალ ბაშოზე კვლავ ელიტაში დაბრუნებისთვის ბრძოლა მოუწევს.

სასწაული პროგრესი აქვს 21 წლის მონღოლ ალტანჰოიაგიინ იჩინოროვას იგივე იჩინოჯოს, რომელსაც პროფესიულ სუმოში მხოლოდ 5 ტურნირი აქვს ჩატარებული და უკვე მე-3 იერარქიულ საფეხურს (სეკივაკე) უწია. სეკივაკე გახდა 28 წლის ბულგარელი აოიამაც (დანიელ ივანოვი), რომელმაც რიკიშის კარიერა 2009 წელს დაიწყო.

ბანძუკეს სათავეში იოკოძუნები – ჰაკუჰო, კაკურიუ და ჰარუმაფუჯი და ოძეკები – კოტოშოგიკუ, კისენოსატო და გოეიდო რჩებიან, კომუსუბის ტიტულით კი პირველად გაირჯება ოსაკას პრეფექტურის 28 წლის მკვიდრი იკიოი.

შეგახსენებთ, რომ მომდევნო ბაშო ფუკუოკას საერთაშორისო ცენტრში 9-23 ნოემბერს შედგება.