17-წლამდე ფეხბურთელთა შორის დღეს ევროპის ჩემპიონატის შესარჩევი ეტაპი დაიწყო. მეორე ჯგუფის მატჩებს, სადაც ლიხტენშტეინი, ესტონეთი, პოლონეთი და საქართველო შედიან, თბილისი მასპინძლობს. მატჩები “მიხეილ მესხის” ძირითად და სათადარიგო მოედნებზე იმართება.

ანალოგიური დონის ტურნირი, ოღონდ 19-წლამდე ფეხბურთელთა შორის საქართველოს დედაქალაქში რამდენიმე კვირის წინ გაიმართა. მსგავსად 19-წლამდელთა შესარჩევი ეტაპისა, 17-წლამდე საქართველოს ნაკრების ფეხბურთელებიც მხოლოდ “მიხეილ მესხის” ძირითად მოედანზე ითამაშებენ, ხოლო დანარჩენ გუნდებს ორივე მოედანზე მოუწევთ ასპარეზობა.

პოლონეთმა ესტონელთა დამარცხება ადვილად მოახერხა, ზედმეტი ენერგიეს დახარჯვის გარეშე. მე-7 და მე-12 წუთებზე 16 წლის ცაცია კამილ ვოიტკოვსკიმ დუბლი შეასრულა. პირველ შემთხვევაში გოლი თამაშიდან გავიდა, ხოლო მეორე გოლი ზუსტად შესრულებულ თერთმეტმეტრიანს მოჰყვა.

კამილ ვოიტკოვსკი “ლეგიას” ყოფილი მოთამაშეა, ამჟამად “პოგონში” გამოდის. ამ შემტევის პოლონურ ექსტრაკლასში დებიუტი მიმდინარე თვეში, ნიკა ძალამიძის “იაგელონიასთან” შედგა. სხვათა შორის, იმ მატჩში ქართველმა დუბლი შეასრულა და საგოლე პასიც გააკეთა.

პირველი ტაიმის დარჩენილ ნაწილსა თუ მეორე ტაიმში ესტონეთის ნაკრების ფეხბურთელებს შეტევაში ძალიან უჭირდათ. ერთადერთი ნათელი წერტილი მე-9 ნომრით მოთამაშე მატიას კაიტი იყო. ცდილობდა, მოძრაობდა, დასწრებაზე კარგად თამაშობდა, თუმცა ხან თანაგუნდელები ვერ უბამდნენ მხარს, ხანაც ბურთს ზედმეტად ათრევდა და მალევე კარგავდა.

აღსანიშნავია, რომ 16 წლის მატიას კაიტი გასულ ზაფხულს “ლევადიას” ასაკობრივი გუნდიდან ინგლისურ “ფულემში” გადავიდა, რაც უდაოდ წარმატებული ნაბიჯი დიდი ფეხბურთისკენ მავალ გზაზე.

მოედანზე მყოფთაგან ინგლისურ კლუბში კიდევ ერთი ფეხბურთელი თამაშობს, ოღონდ ამჯერად - პოლონელი. 16 წლის ცენტრალური ნახევარმცველი ჰუბერტ ადამჩუკი გასული ზაფხულიდან მოყოლებული ლონდონის “ჩელსის” 18-წლამდელთა გუნდის წევრია.

სწორედ ადამჩუკმა გაიტანა ორი გოლი მატჩის მიწურულს. ამ დროს ბალტიისპირელები ფსიქოლოგიურადაც ვერ იყვნენ სათანადოდ. ყველაზე ცუდად ფეხბურთელები მაშინ გრძნობენ თავს, როცა მეტოქეს ყველაფერი გამოსდის და თავად არაფერი.

გარდა ამისა, კლასში დიდი სხვაობა შეინიშნებოდა, თუმცა ესტონელი მოთამაშეები ცდილობდნენ სათამაშო დისციპლინა არ დაერღვიათ და მაქსიმალურად სწორად ეთამაშათ.

კვლავ გაგვაკვირვა სტადიონის დიქტორმა. რამდენიმე კვირის წინათ 19-წლამდე შესარჩევ ეტაპზეც ანალოგიური პრობლემა იყო, როცა ტურნირი ორგანიზების მინიმალურ დონესაც ვერ აკმაყოფილებდა. დღეს მეორე ტაიმის მსვლელობისას დიქტორმა მხოლოდ ერთი ცვლილება გამოაცხადა, ხოლო გოლის ავტორი ერთხელაც არ უხსენებია. ეს ფაქტი მხოლოდ ერთ რამეზე მიუთითებს - ორგანიზატორებს, რომლებსაც აღნიშნული პრობლემის მოგვარება ევალებათ, ელემენტარული პატივისცემა არ აქვთ როგორც გუნდების ასევე მატჩზე დამსწრე მაყურებელთა მიმართ. პირველი შემთხვევა რომ ყოფილიყო, კიდევ შეიძლებოდა თვალის დახუჭვა, მაგრამ უკვე მერამდენე შეხვედრაა ასე გრძელდება. ამასთან, ეს ხომ საერთაშორისო მატჩია, უცხოელი გიყურებს და გაკვირდება...

პოლონეთი – ესტონეთი 4:0 (2:0)

თბილისი, მიხეილ მესხის სათადარიგო მოედანი, 20 მაყურებელი

პოლონეთი: ზინელი, ანდრზეიევსკი, ჰოლონია, ზიეკიოლი, პრუშასცუკი (ზისცეკი 41), ოზვიაკი (კაზმარსციკი 84), ადამჩუკი, ვოიტკოვსკი, ბელიკი, ვოიდაკი, მისტკოვსკი (ლისტკოვსკი 72)

მთავარი მწვრთნელი: რობერტ ვოიციკი

ესტონეთი: სუჰომიატნიკოვი, ნილოპი, კანელი, ვილოტა, კანტერი, მუცო, მიჰაილოვი (პადარი 50 ), კუსმა (ვალასო 66 ), კაიტი, ვაინუმე, იარველადი

მთავარი მწვრთნელი: ლარს ჰოპი

გოლები: 1:0, 2:0 ვოიტკოვსკი (7, თერთმეტმეტრიანი 12), 3:0, 4:0 ადამჩუკი (80, 80+3)

მთავარი მსაჯი: მიჰალი ფაბიანი (უნგრეთი)

ასისტენტები: ლაზლო ვისზოკაი (უნგრეთი), დავით ჩიგოგიძე (საქართველო)

მეოთხე მსაჯი: გიორგი ვადაჭკორია (საქართველო)

გაფრთხილება: ვილოტა (11), კანელი (25), პრუშასზუკი (38), კუსმა (65)