იტალიის “რომას” თავკაცი რუდი გარსია განსაკუთრებით მოულოდნელს ვერაფერს ხედავს იმაში, რომ სერია ა-ს მე-8 ტურის შეხვედრაში ჩემპიონატის ერთ-ერთმა ლიდერმა “რომამ” მიმდინარე გათამაშების ერთ-ერთ აღმოჩენასთან, “სამპდორიასთან” ქულები დაკარგა (0:0).

როგორც მატჩის შემდეგ, რომაელთა თავკაცმა განაცხადა, გენულები წლეულს ჩინებულ ფორმაში იმყოფებიან.

“სამპდორია” ძალიან კარგი გუნდია, თუმცა, უპირატესობას ჩვენ ვფლობდით და კარისკენაც ბევრჯერ დავარტყით, მაგრამ კარის ჩარჩოში ბურთი მწირი რაოდენობით გავგზავნეთ.

რაც შეეხება “ბაიერნთან” თამაშს, შემიძლია გითხრათ, რომ ეს თამაში ფაქტობრივად დავიწყებულია” – განაცხადა პრესკონფერენციაზე გარსიამ.

“რომა” სერია A-ში 19 ქულით “იუვენტუსთან” ერთად პირველ-მეორე ადგილებს ინაწილებს, თუმცა ტურინელებს მე-8 ტურის შეხვედრა ჯერ კიდევ გასამართი აქვთ (დღეს, 18 საათზე).

გიორგი მელქაძე